Shark di umubra sa La Salle

Nakabawi ang ICTSI-La Salle sa kanilang mahinang simula para hatakin ang 65-52 panalo kontra sa Shark Energy Drinks kahapon para mangailangan na lamang ng isang panalo upang makakuha ng play-off berth patungong finals ng 2002 PBL Chairman’s Cup sa Makati Coliseum.

Pinangunahan ni James Yap ang ICTSI Archers sa paghakot ng 21-puntos upang ma-out-score ang kanilang kalaban, 42-12 sa second half at makopo ang kanilang ikaapat na panalo sa semifinal round at ika-11 sa kabuuang 17 laro

Kailangang manalo ng La Salle laban sa Blu Sun Power sa Lunes para makahabol sa 5-of-8 incentive rule na magkakaloob sa kanila ng karapatang kalabanin sa play-off ang magtatapos na no. 2 team para sa huling slot ng finals.

Ang 12-puntos na produksiyon ng Power Boosters sa second half ang ikalawang all-time lowest score sa isang half.

Maganda ang simula ng Shark na agad naka-10-0 at umangat pa sa 36-8 sa ikalawang quarter ngunit nagsimulang mag-init si Yap na umiskor ng three-point play upang makalapit ang Archers sa 23-40 at hindi nila hinayaang makaiskor ang kalaban ng walong minuto sa ikatlong quarter sa kanilang pagbabalik. (Ulat ni CVO)