E-bikes, e-trikes titiketan simula bukas
Lumabag sa pagdaan sa national road
MANILA, Philippines — Simula bukas (Abril 17) ay sisimulan nang isyuhan ng traffic violation tickets ng Metropolitan Manila Development Authority (MMDA) ang mga e-bike na dumaraan sa mga national road sa Metro Manila.
Ito ang sinabi kahapon ni MMDA Chairperson Romando Artes bilang konsiderasyon sa nagpapatuloy na strike ng ilang grupo maging ang information dissemination campaign ng ahensya.
“Yung sa e-trikes and e-bikes po, ngayong araw (Abril 15) po ang simula ng implementasyon. Pero hindi pa po kami magti-ticket. Maninita lamang po kami. Ito po ay part ng information campaign and in consideration po na may tigil-pasada ngayon,” ani Artes.
Matatandaang sinabi ng MMDA na ipapataw ang P2,500 multa sa mga taong lalabag sa batas ngunit para sa mga walang lisensya o vehicle registration documents, ang kanilang mga e-bike ay i-impound.
Sa ilalim ng inilabas na circular ng MMDA, ipinagbabawal na ang pagdaan ng mga e-vehicles sa mga national road sa Metro Manila tulad ng Claro M. Recto Avenue, Manila President Quirino Avenue, Manila, Araneta Avenue, QC, Epifanio Delos Santos Avenue Katipunan/C.P. Garcia, QC, Southeast Metro Manila Expressway, Roxas Boulevard, Taft Avenue, Osmeña Highway, Shaw Boulevard, Ortigas Avenue, Magsaysay Boulevard/Aurora Boulevard, Quezon Avenue/Commonwealth Avenue, A. Bonifacio Avenue, Rizal Avenue, Del Pan/Marcos Highway/McArthur Highway, Elliptical Road, Mindanao Avenue, Marcos Highway, Boni Avenue, España Boulevard.
Nakatakdang tukuyin pa ang ilang mga kalsada na idaragdag sa listahan.
- Latest
