Ang tinud-anay nga pagkamasinugtanon

Ang balaod sa Amahan kaniadto kinahanglan nga tahuron. Ang anak walay igong gahum pagbalibad sa kabubut-on ug sugo sa Amahan kay alang sa ilang kultura usa man kini ka dakong insulto alang sa amahan labina kun ikaw ang kaamagulangan.

Nibalibad ang kamaguwangan nga motrabaho unta sa parasan, apan nausab ang iyang hunahuna ug nitrabaho siya.

Samtang ang manghud nihatag dayon sa iyang  madasigong pagsanong apan wala siya moadto.

Ang maguwang maoy nituman sa kasugoan sa iyang amahan bisan pa sa iyang nahaunang pagbalibad.

Kasinatian

Daghan nato ang mga late bloomers labina kun maghisgot kita og kabag-ohan sa kaugalingon. Dili kita makahukom kun malangit o ma impiyerno ba ang tawo sanglit bisan diha sa higdaanan kahigayonan man sa pagbag-o ug paghinulsol.

Mao kini ang hinungdan kun nganong daghang mga kobrador og buhis ug  mga makasasala ang mahimong mahiuna pa kay kanilang nagpatuo nga mga balaan ug mga matarong. It is better late than never matud pa.

Lihok

Karong semanaha hinumdomi ang mga tawo nga giisip mong nakapasakit nimo ug mga tawong imong napasakitan. Dad-a silang tanan sa imong mga pag-ampo.

Pangamuyo

Kaloy-i ako Ginoo nga usa ka makasasala!

Tanang hugaw gipasangil

Gipanghimakak ni Bise Presidente Sara Duterte nga kaila niya ang kanhi security officer ni kanhi Speaker Lord Allan Velasco nga si Rodulfo Gracioso Jr., kinsa nangangkon nga mi-deliver sa bise presidente ug sa iyang banay og minaleta nga kwarta nga mokabat og P2 bilyones.  Makapahibulong ngano nga karon pa motumaw kining storyaha nga nalambigit kunohay ang bise presidente sa maleta issue.  Hinoon, sa balaod, ang pasangil dili pa katoohan hangtud nga kini mapamatud-an.  Matud pa sa usa ka diehard supporter ni Sara, “Ang wala na lang nila ipasangil sa bise presidente mao nga bati kini’g nawog, budlat og mata, pandak ug adik-adik.”  Fezteleern!

Sobra ka-guwang

Hingpit na ang pag-oktaba sa Barangay ug Sangguniang Kabataan Elections (BSKE) ngadto sa Nobyembre 2 sunod tuig, human gilagdaan sa presidente ang R.A. 12326 nga naglugway sa termino sa mga barangay leaders gikan sa 4 ngadto sa 5 na ka tuig.  Gawas nga walay tataw nga kaayohan ang pagpunay’g postpone sa BSKE, maingon usab nato nga usa kini ka tampaling sa atong demokratikanhong katungod sa pagboto.  Matud pa sa akong silingan, “Ni’ng maong kalambuan, daghan na mga SK nga nahimo na’ng ginikanan karon, busa inay Sangguniang Kabataan, nahimo na’ng Sobra Ka-guwang ang meaning sa SK.” Muleeng!

Pasalig nga pakyas

Gipahimangnoan sa PNP ang mga konsumidor nga magmabinantayon sa pagpalit nila og bugas kay posible nga gipang-repack kini sulod sa mga peke nga branded nga sako nga mahimo’ng makailad sa mga customer sa kalidad ug tinubdan niini.  Dili kaayo angay kabalak-an ug dili usab klaro ang pangilad ni’ng maodn modus kay mahimo man’g lili-on ang sulod sa sako o ba kaha mopalit lang og kinila.  Alang sa akong silingan, “Mas dakong pangilad ang pasalig sa gobyerno nga himoong tag-P20 na lang ang presyo sa bugas.  Ug labaw pang salawayon ang paghatag og baho nga bugas isip ayuda” Ateerr!

Wa mapurdoy bisan barato

Gitun-an sa Department of Agriculture ang posibleng pagpasaka sa pork tarrifs aron matabangan ang mga local hog raisers kinsa nakigbisog karon sa nagkaubos nga farmgate prices sa karne’ng baboy tungod sa nagkataas nga importasyon ug dakong pork inventory.  Mao kini ang tanghaga sa ekonomiya.  Dili diay tanan’g barato maka-ayo.  Apan dili motoo niini ang akong amigo.  Matud pa niya, “Ngano lage na’ng mga baligya sa Kakeng ug sa Chohook, labihan mang baratoha pero wala man mapurdoy ang mga Intsik nga negosyante.”  Madahaan!

Nag-upgrade sa bahag

Gidili na karon sa lungsod sa Daanbantayan, Cebu ang ang paghukas o dili pagsul-ob og t-shirt sa ibabaw’ng bahin sa lawas sa mga publikong lugar human mapalabang ang Municipal Ordinance 11-2026.  Excempted hinoon kadtong anaa sa kadagatan, mga resort ug pribadong lugar, kadtong magpasuso ingon man mga construction workers of laborers.  Angayan nga ipatuman ang maong matang sa ordinansa sa atong mga kalungsoran.  Kay matud pa bitaw, “Bisan gani si Tarzan, nag-upgrade man sa iyang bahag sa dihang nahitaak na siya sa kalungsoran.”  Pagkatoytoy!