Criminal liability

Makapanlimbawot gayud sa balahibo ang nahitabong dugoon nga pagpamusil sulod sa usa ka tulonghaan sa dakbayan sa Tacloban sa niaging semana nga mikalas og kinabuhi sa tulo ka tinun-an.

Nagpakita lamang kini sa panahon nga nagkaanam na og pagkabayolente ang kabataan. Daghan ang nag-ingon nga gumikan kini sa modernong teknolohiya diin misulbong usab ang dili maayong talan-awon sa social media.

Ang mga suspek sa pagpamusil duha ka tinun-an nga pulos menor de edad. Ug dakong tanghaga nganong nakasulod sila sa tulonghaan dala ang armas ug dayong pamusil sa mga biktima nga tulo usab ka menor de edad.

Human sa maong panghitabo, mitumaw ang dakong debate mahitungod sa liability sa duha ka batang suspek. Angay ba silang itaral sa hukmanan ug ibilanggo tungod sa krimen nga ilang nabuhat?

Kon ang Republic Act No. 9344 o ang Juvenile Justice and Welfare Act of 2006 maoy atong basihan, exempted sa criminal liability ang nga 15-anyos paubos, unless kon aduna gyuy motibo sa ilang binuhatan.

Apan sa nanggawas nga mga taho, planado kuno ang maong pagpamusil sa maong mga suspek. Gani makita sa social media ang ilang binayloay sa mensahe mahitungod sa ilang plano, apil na ang ilang pag-secure sa armas.

So dinhi atong makita nga lisod mapapas ang mantsa sa criminal liability sa maong mga suspek. Kini kon ato usab analayson ang gibug-aton sa ilang sala. Gani mi-invoke pa sila sa balaod nga maghatag kuno nila og gamay lamang nga silot.

Ang maong pagpamusil didto sa Tacloban maoy usa sa mangilngig nga panghitabo sulod sa tulonghaan sa kasaysayan sa atong nasud. Hinaut nga insaktong hustisya ang makuha sa mga pamilya sa mga biktima.