Nasaan na ang malayang Kongreso
ANG sabi, kung ang Mababang Kapulungan ay kontrolado ng Ehekutibo, ang Senado ay mas malaya sa mga paninindigan nito. Na sa ngalan ng demokrasya, kaya nitong tutulan ang anumang panukala ng administrasyon. Ngunit hindi pala laging totoo ito.
Kusang nagbitiw si Sen. Juan Miguel Migz Zubiri dahil daw sa pressure mula sa itaas. Lumabag daw siya sa kagustuhan nito. Ano’ng kagustuhan iyon?
Unang-una, ang matibay niyang pagkontra sa Cha-cha through Peoples Initiative, pangalawa ay ang hindi niya pagpigil sa patuloy na hearing ng Senado sa tinatawag na PDEA leaks na isinasangkot mismo si Presidente Bongbong Marcos sa usapin ng paggamit ng droga.
Marangal ang ginawa ni Zubiri na kusa siyang nagbitiw sa puwesto at ang hinirang na kapalit niya si Senador Chiz Escudero. Pero inamin niyang siya ay “heart broken” dahil nang umuugong pa lang ang balitang papalitan na siya, maraming kumampi sa kanya at nangakong susuportahan siya. Pero sa bandang huli, nangawala ang mga ito.
Nakasasakit nga naman ng loob ito. Ang pangyayari ay nagbigay ng batik sa ating legislature na dapat sana ay malaya sa pagdedesisyon at hindi lang bow nang bow sa mas nakatataas.
Ngunit ganyan yata talaga sa pamahalaan. Hindi maihiwalay ang pamumulitika. Kung sino ang mas makapangyarihan ay palaging siya ang nasusunod.
- Latest
