Probinsya gipaubos sa State of Calamity

CEBU, Philippines — Gipaubos ni Gobernador Gwendolyn Garcia ang tibuok Probinsya sa Sugbo sa state of calamity tungod sa nahimong epekto sa huwaw o grabeng kainit dala na pud sa El Niño sa tibook Probinsya.

“Today, I will issue an Executive Order that will put the Province of Cebu under a state of calamity. This will be further supported by a Board Resolution that will be passed when the Provincial Board meets this Monday,” matud ni Garcia kagahapon Mayo 17 atol sa press conference nga gihimo niini sa Kapitolyo.

Si Garcia nagkanayon nga wala magpasabo nga mideklarar siya og state of calamity, manghatag og ayuda ang Kapitolyo.

Iyang gipasabot nga ang himoon sa Probinsya mao ang pangita og paagi nga matabangan ang mga konstituwente niini nga mahatagan og oportunidad nga makasugakod sa kalisod sa panahon karon hilabina nga adunay huwaw.

Ang Provincial Agriculturist nga si Roldan Saragena mitaho nga moabot  P176.8 milyon ang kantidad sa danyos sa agrikultura sa Probinsya sa Sugbo tungod sa huwaw o El Niño phenomenon

Base sa Mayo 16 nga datus sa Provincial Agriculturist's Office, moabot sa 12, 312 ka mga mag-uuma ug mananagat ang apektado gikan sa 32 ka mga lungsod ug siyudad sa Probinsya sa Sugbo.

Moabot usab sa 3, 179.32 ka ektarya sa luna ang apektado sa huwaw.

Dugang ni Saragena, ang maong datus gikan kini sa taho sa 32 ka mga local agriculturist's office kon diin sa consolidated report sa Probinsya, 3,676 ka mag-uuma sa humay ug mais ang apektado; 3, 086 ang apektado nga mag-uuma sa utanon; 5,272 sa fruit trees ug 254 ka mag-uuma sa lagutmon.

Pag-abot sa aquafarm, 24 ka mga mananagat ang apektado kon diin ang kinatibuk-ang danyos moabot sa P887,300.

Ang mga mag-uuma sa Probinsya matod ni Garcia mahatagan na pud kini og insuranfe sa kadaot sa ilang pananom ug panginabuhian pinaagi sa Philippine Crop Insurance Corporation ( PCIC).

Si Garcia mihisgot usab nga usa sa ilang gipangitaan karon og solusyon mao ang kakulang na sa suplay sa tubig kun diin matod sa 60,000 cubic meters ang "shortfall" sa tubig sa Metro Cebu tungod sa pagkauga na sa Mananga ug Lusaran river nga duha sa tinubdan sa tubig nga kuhaon sa Metro Cebu Water District (MCWD).

Tungod niini, unom ka mga kontraktor ang gihatagan og special permits  alang sa desilting o pagkubkob o paglimpyo sa Mananga.

Bisan didto sa Luyang River sa Carmen nga usa pud sa tinubdan sa tubig pagsuplay sa Metro Cebu, nagpahigayon na pud og desilting aron dili makababag ang mga dagkong bato ug ubang minerales sa pag-agas sa tubig. IBM BANAT NEWS