Abuso na ni

Unsay ikasulti ninyo niining gihimo sa Tokagawa nga bisan og wa pa sila tuguti nga makapangolekta og parking fees sa adlaw’ng Domingo, nagbutang na sila og mga pahibawo nga ang pagpangolekta og parking fees apil na ang Domingo?

Dili ba kini maisip nga usa ka pagpangabuso? Miabuso na man pag-ayo kining mao nga kompaniya nga maoy nagpadagan niining CEPMA, nga mangolekta sa parking fees sa mga tag-iya og sakyanan nga moparking daplin sa karsada dinhi sa siyudad.

Si Cebu City Councilor James Cuenco nga maoy chairman sa Committee on Transportation sa Cebu City Council, mitug-an nako nga wa man mohatag og pagtugot ang konseho nga apilon ang Domingo nga mangolekta og parking fees ang CEPMA.

Labaw na nga wa sila mohatag og pagtugot nga paabton ngadto sa alas 9 sa gabii ang pagpangolekta og parking fees gikan sa mga tag-iya og sakyanan nga moparking daplin sa mga karsada.

Gani, ang Tokagawa gikatakda unta nga moatubang sa mga sakop sa Cebu City Traffic Management Board aron sa paghangyo nga suportahan ang ilang tinguha nga tugutan sila nga mangolekta sa adlaw’ng Domingo.

Nagpanikad na unta ko nga mopasupot og daghang pangutana sa mga representante sa Tokagawa kabahin sa ilang gihimo nga kaniadto nagbuot-buot ra sila’g pangolekta sa Domingo ug giabot ngadto sa alas 9 ang pagpangolekta.

Giundang nila ang ilegal nilang gihimo dihang nasuko na kanila si Mayor Michael Rama, apan karon mibalik na usab sila sa pagpangolekta sa Domingo ug gipangilisan ang mga signages nga anaa gibutang daplin sa mga karsada.

Grabeha na man niining Tokagawa uy. Kinsa man gyud ang gisaligan nila diha sa Cebu City Council? Kinsa man sa mga opisyal sa Dakbayan sa Sugbo nga maoy ilang gisaligan? Nganong isog man kaayo sila mohimo og mga kalapasan?

Miingon pa ra ba ang ilang operations manager nga wa kuno sila’y nahimong kalapasan sa parking ordinansa sa siyudad.

Kana diay’ng pagpangolekta sa adlaw’ng Domingo bisan og klaro kaayo diha sa signages nga Lunes hangtud sa Sabado ra ang gitugot nga pagpangolekta?

Ayaw ko’g ingna nga ilang ipalusot nga nangolekta sila og Domingo kay mao may anaa sa signages?

Maisip na gyud nga pagpangabuso kining ilang gihimo kay wa man kini sa gipirmahan nga Joint Venture Contract sa Tokagawa ug ni Mayor Rama.

Nganong nagbutang na man mo og mga signages nga apil na ang Domingo nga gitugot ang pagpangolekta, giaprobahan na diay ni sa City Council?

May pagtugot na diay ning inyong tinguha gikan sa Cebu City Traffic Management Board? Magbaton sab ta og delicadeza uy.