EDITORYAL - Nga posters sa politiko nagpasad na sa dalan

Ubay-ubay na sab nga mga paskin o mga tarpaulins ug posters ang makitang namilit diha sa mga punoan sa mga kahoy nga gitanom diha kilid sa mga kadalanan sa Sugbu. Kaning mga paskin dili advertisements sa mga produkto o mga kompanya kondili mga dagway sa mga politiko nga gustong magpaila sa ilang kaugalingon ngadto sa publiko.

Nagsingabot na ang mid-term elections karong tuig 2025 mao tingaling daghang mga ambisyosong mga tawo nga gustong modagan sa piniliay ang mipasad-pasad na sab sa ilang mga dagway diha sa mga posters.

Makatawa nalang ang mga motorista, kung wala pa magkaduol ang eleksyon wala man ni makadumdom ning mga tawhana pagpakita og pagpakabana sa kaluwasan sa mga drayber diha sa karsada pinaagi sa pagpahinumdom nga mag-amping kanunay sa pagmaneho.

Halos tanang punoan sa mga kahoy ilabi na diha sa McArthur Highway sa Cebu City padung sa Mandaue City dunay daghang mga posters sa mga politiko. Ang uban incumbent senators pa gani.

Ang makahibulong ani, nganong wala may gibuhat nga lakang ang mga lokal nga kagamhanan pagpatangtang niini?  Kay hadlok sila kay mga senador kining mga dagway nga naa sa mga tarpaulins ug posters?

Ngano man nga kun mga kompanya ang magbutang ani sa mga punoan sa kahoy pag-promote sa ilang mga produkto, promos o mga events, ipatangtang man dayun kay dunay mga ordinansang nagdili sa paglansang sa mga punoan sa kahoy kay ikamatay kini niini.

Sa ato pa, exempted ani ang mga politiko? Patas ba kini? 

Tinuod dili ang mismong mga politiko ang nanaod ani, duna ra silay mga sinuholang mga tawo aron pagbutang niini.  Apan dili ba diay applicable aning mga tungora ang mga ordinansa ug environmental laws? Nananghid ba kining mga tawhanang gisuholan sa pagpanaod diha sa mga lokal nga kagamhanan?

Kun duna may permiso o pagtugot, pwede ra diay nilang lansangan ang mga punoan sa kahoy?