Hustisya ni Uriel

Dili matukib ang kasakit nga gibati sa pamilya sa 23 anyos nga si Jasrel Uriel Larumbre ilabi na ang amahan ug inahan niini human siya nakalas niadtong Domingo sa buntag dapit sa simbahan sa Redemptorist sa Barangay Camputhaw.

Dili makatuo ang pamilya o bisan ang mga tawo nga aksidente o disgrasya kadto kay tataw man nga gibundol og tuyo ang iyang motorseklo.

Ugaling mapamatud-an nga gituyo gyud ang pagbundol, aw usa ka krimen ang nahitabo nga gikinahanglan nga mapanubag ang criminal.

Apan unsaon man nga hangtud karon wala pa may nawong ang nakadisgrasya sa batan-on nga maoy nakapasamot sa kasakit sa gibati karon sa iyang mga mahal sa kinabuhi.

Gihulagway sa inahan ang iyang anak nga usa ka mapinanggaon kinsa misaad kaniya nga ang pagpasar sa board exam sa iyang natapos nga Civil Engineering maoy iyang iregalo sa iyang mama sa birthday niini karong Abril 30.  Apan dili na kini mahatagan og katumanan kay gikutlo naman ang iyang kinabuhi.

Gani naghinamhinam pa kini nga motambong sa ilang family day niadtong adlaw’ng Domingo unta apan ang gikahinaman nga pangtigom nahitabo man apan siya ang gialirongan tungod sa iyang kamatayon.

Ang iyang amahan nga usa ka seaman tua pa sa Argentina ang hilabihan ka guol intawon kinsa gikinahanglan pa nga kuhaon og helicopter sa barko nga gisakyanan aron makaadto sa mainland alang sa iyang pagpanukad aron makapauli sa nasud aron masud-ong ang iyang anak sa kataposan nga higayon.

Adunay daghang migawas nga report ilabi na sa social media pero pulos pa kana speculation kon si kinsa ang anaa sa luyo sa gidangatan ni Uriel. Kong si kinsa kadtong adunay kasayoran sa tinuod nga nahitabo unta makig-alayon sa otoridad ni bisan unsa nga ahensiya sa kagamhanan aron mahatagan og hustisya ang iyang gidangatan.

Kadtong nakaingon sa kamatayon sa basketbolista unta makonsensya siya kon nakaila pa siya niini ug motahan sa balaod aron usab mahatagan og katin-awan kong tinuyo og dili ang nahitabo.

Labaw sa tanan unta mogawas ang kamatuoran bisan pa og kinsa siya kay nakasala man busa kinahanglan niyang bayran.