Fake news bang pagpangutana?

Sa usa ka SMNI program ni kanhi Presidente Rodrigo Roa Duterte (FPPRD), siya miingon: ‘Nga kon malingkoran kunog korap kaayong House Speaker ang Kongreso, seguradong mahurot ang kuwarta sa taong-bayan.’ Tingale, namatikdan sab niya, ang pagkasuroyan ni Martin Romualdez.

Kon mobisita si Presidente Bongbong Marcos (PBBM) sa lainlaing nasud (uban usahay ang paglingawlingaw-saksig mga bigtime sports events), anaa gayod si Martin, pirmeng kuyog ni PBBM ug sa ilang entourage. Giingon nila niini pag-usar ang atong kuwartang pinatud-ag singot.

Mao nga katungod sa katawhan ang pagpangutana kon asa ug giunsa man paggamit sa atong mga lider ang atong kuwartang hinagoan? Angay ba diay kining ikasuko kon kita mangayog husay gikan sa atong mga Kongresista ug Senadores?

Nganong allergy man sila kon pangayoag resibo kon wala silay kahiwiang gihimo? Nganong ipa-ICC man hinuon si PRRD ug nagplanong ipa-impeach si Vice-President Sara ‘Inday’ Z. Duterte-Carpio, imbes magkahiusa silang tanan pagpangalagad sa katawhan nga maoy dapat nilang serbisyohan ug dili kay si Martin lang?

Sa laing programa sa SMNI, Bayan Kasama ng Laban, ang hosts, diin usa si Ka Eric Celiz, nakadawat og info gikan sa usa kuno ka empleyado sa Kongreso, nagpahibalo nga ang transportation/travelling expenses ni Martin sulod sa usa ka tuig mikabat og P1.8B. Busa, nagutana si Ka Eric kon tinuod ba kini?

Ug kon mahimo, mas maayo untang mahatagag hustong kuwentada ang katawhan. Buwahan, matubag kining maong pangutana?

Apan imbes mopresentar og katin-awan si Martin, ang Kongreso pinaagi sa pagpangamahan ni Kongresista David C. Suarez, miumol man hinuog resulotion sa paghimog imbestigasiyon sa franchise sa SMNI (pro-good governance network) nga ilang gipasanginlang mipakatap og fake news nga nakadaot sa imahe ni Martin?

Pastilan, kanus-a ba ang ‘question mark’, nahimong period?  Ang ‘question mark’, nagpangutana, nagsuta-susi, nagpangitag tubag. Samtang ang ‘period’, nagtug-an, nag-asoy, nagpakita, nagpadayag. Busa, never, ang ‘question mark’ mahusgahang ‘fake news.’

Unya, nganong initan man sa Kongreso kanang SMNI nga giisip sa milyonmilyong social media viewers-users nga maoy tuburan sa patas-matinud-anong pamalita kang kansang baroganan dili gyod mapalit og salapi? Pro-good governance man kini.  Ug nganong kontrahan man sa Kongreso? Nagpasabot bang atong Kongreso, dili gustog ‘good?’ Nangutana lang, ha? No hurt-feelings!