EDITORYAL - Unang kaso vs Duterte
![EDITORYAL - Unang kaso vs Duterte](https://media.philstar.com/photos/2023/11/15/1_2023-11-15_23-26-02.jpg)
Sa labing unang higayon gikan sa pagkapupos sa iyang termino, gipasakaan si kanhi presidente Rodrigo Duterte og kaso sa usa ka magbabalaod tungod sa matud pa death threats ug cybercrime law atol sa usa sa mga programa sa usa ka sibyanaanan.
Ang kaso gisang-at ni ACT Partylist Rep. France Castro niadtong Oktubre sa korte sa Quezon City ug gipadad-an og summon ang kanhi pangulo sa pagtubag sa pasangil batok kaniya uban sa pagmando kaniya nga mopatim-aw sa korte karong sunod buwan. Naila na si Duterte nga way kahadlok kun makabuhi og pamahayag batok ni bisan kinsang iyang gustong puntariyahon.
Ang nakaapan lang bisan naglingkod pa siya sa Palasyo wala siyay preno sa iyang mga pamahayag butang nga gisaway sa uban ug bisan sa iyahang mga sakop.
Mao sab kini ang taras nga ganahan sa mga nisuporta kaniya nga nagtuboy kaniya sa kalamposan sa politika bisan mayor pa siya kaniadto sa Davao City hangtud nga nahimong presidente sa nasud. Bisan gani iyang mga kaalyado ug kapartido nga naa karon sa Kongreso mitambag kaniya nga maghinayhinay na sa iyang pagpanghulga sa mga kaubanan nilang magbabalaod.
Ning bag-o, gipagawas na sa korte si kanhi senador Leila de Lima nga higpit niyang kritiko kinsa nabilanggo sud sa kapin unom ka tuig sukad nga milingkod si Duterte.
Daghan ang nagtuo dili lang si de Lima ang gihinimo-himo lang og mga akusasyong may kalambigitan ang senadora sa illegal drug trade sa National Bilibid Prisons aron siya piiton ug pahilumon.
Gani mismo ang mga tawong nibarog nga mga star witnesses batok kang de Lima, nag-iyahay na og bakwi sa ilang mga pasangil batok kaniya ug miangkong gihulga sila aron kini buhaton, hinungdan nga nabasura ang duha sa tulo ka mga kasong iyang giatubang. Samtang gipaabot pa ang ikatulong kaso nga dunggon sa korte.
Karong nakagawas na si de Lima, siya namahayag nga mokooperar siya sa International Criminal Court nga naghimo og imbestigasyon batok sa mga extra-judicial killings ubos sa pamunoan ni Duterte sa Davao City ug sa dihang kini nahimong presidente diin daghang drug suspects ang nangamatay sa anti-illegal drugs operations nga gikwestyon sa mga human rights groups.
- Latest