Mga timaan sa super typhoon
Napahinumdoman si kanhi Presidente Rodrigo Duterte sa katinuod sa sulti sa katiguwangan nga kon mag-uwan gani magbunok gyod. Wa pay lunop, wa pay timaan nga mabanlas siya, pero nagkanihit ang mga lugar nga kapasilongan sa pagkisdom sa kahimtang sa panahon sa nagkagamay niyang kalibotan.
Way kahulogan para ni Duterte ang pasalig sa Philippine Atmospheric, Geophysical and Astronomical Services Administration (PAGASA) nga ang bagyong nagkaduol sa Mindanao nihuyang ug nahimo na lang nga low pressure area (LPA). Kay para niya ang mosunod maoy pasiunang mga timaan sa umaabot nga super typhoon:
* * *
Gisugo siya sa Quezon City Prosecutor s Office pagtambong sa pasiunang imbestigasyon sa iyang kasong grave threat (tungod sa paghulga pinaagi sa TV station ni Apollo Quiboloy nga iyang patyon si Kongresista France Castro) sa unang duha ka Lunes sa sunod buwan, Disyembre 4 ug 11;
Ang summon, nga maoy unang nadawat ni Duterte sukad nikanaog sa Malakanyang, mahimong masundan pa kon madasig ang mga tagtungod sa kaliboan ka biktima sa laktod nga pinatyanay sa kampanya batok sa drugas karong napahinumdoman nga wa na siyay presidential immunity;
* * *
Mahimong makasohan sab tungod sa pasangil nga siya ang nagsugo ni kanhi Justice Secretary Vitalian Aguirre II, sa National Bureau of Investigation (NBI), Public Attorney s Office (PAO) ug Philippine National Police (PNP) pagmaniobra sa mga saksi batok ni kanhi Senador Leila De Lima;
Paglingkawas ni De Lima sa prisohan human naka-piyansa mahimong mo-resulta sa hingpit nga pagbasura sa korte sa ikatulo ug kataposang kriminal batok sa kanhi senadora (kansang pagkapriso sa dul-an sa pito ka tuig nanukad sa adlaw-adlaw nga pakauwaw ug pasangil ni Duterte nga si De Lima nag-negosyo og ilegal nga drugas);
* * *
Paglumba og layas sa mga kongresista gikan sa partido ni Duterte nga PDP-Laban, gikan sa 120 atol sa iyang administrasyon ngadto sa 12 sa niaging semana, nga posibleng mohiyos ngadto na lang sa 5 karong semanaha (mas nihit kay sa 10 ka sakop sa Liberal Party, ang partido sa oposisyon nga kanunay niyang kanunayng gibugal-bugalan);
Gipasanginlan siyang utok sa destabilization efforts batok sa administrasyon ni Presidente Ferdinand Marcos Jr.; ug
Mahimong di na mobabag ang Malakanyang kon ipadakop siya sa International Criminal Court (ICC).
* * *
- Latest
