Di para sa nasud kining awaya
Kon nagpaabot ka nga may dakong kausaban nga mahitabo tungod ning away sa mga kampo sa duha ka kinatas-ang mga opisyal sa gobiyerno, mahimong mabawo lang. Kon duna may kausaban nga mahitabo mahimong mga nawong ug mga ngan ray mailisan. Magpadayon ang pahimus sa katungdanan.
Kon naghuwat ka nga dunay mapriso sa mga nagkabulingit sa linabayay og lapok sa mga protagonista, mahimong mahugno lang. Kon duna may masilotan mahimong ang mga mayukmok ra. Ang labing dagkong isda magpabilin nga di madutlan sa balaod ug magpadayon pagpahimus sa ilang mga kinawat.
* * *
Kon naglaom ka nga mabadlong na ang kinawatay karong nagbinistohay ang mga nagtungkawo sa gahom sa ilang mga binuang, mahimong mapakyas lang. Ang mga pasalig sa paghunong sa kinawatay mahimo nga magpabiling istorya lang.
Gani, mas dako ang kahigayonan nga imbes maibanan madugangan hinuon ang pagpangilkil sa hapit tanang transaksiyon sa gobyerno. Kon mosukol kay nahigam na ang mga sindikato sa niaging administrasyon, mahimong sapawan lang og laing grupo nga maningil sa mas dako nilang bahin. Mahimo nga ma-doble o ma-triple ang pangilkil sa labing kurakot nga mga ahensiya.
* * *
Ang mga tinudlo sa bag-ong administrasyon nagpanilap sa kadako sa nakuwarta sa mga opisyal nga ilang gipulihan. Kay wa may bisan usa nga napriso sa nasundang mga kawatan, mag-apura ang bag-ong mga opisyal nga kaambasan kon di man kalabwan ang mga binuang.
May opisyal sa niaging administrasyon nga gipasanginlang nakatigom og P30 bilyones kay ang kinadak-ang transaksiyon sud sa unom ka tuig niagi niya. Iyang batabata sa Sugbo nga nikalit sab og burot giingong nakabolsa sab og P2 bilyones.
* * *
May mga timaan nang ang away sa duha ka kampo sa administrasyon di para sa nasud ug katawhan kon dili sa personal nga mga interes sa mga hingtungdan:
• Si Bise Presidente Sara Duterte Carpio padayong nagdumili paghatag og kuwentada giunsa paggasto ang iyang confidential funds (CF); ug
• Mga kongresista ug mga senador niisnab sa demanda ni kanhi Presidente Rodrigo Duterte sa audit sa ilang MOOE (maintenance and other operating expenses) nga giingong, sama sa CF ni Carpio, wa say resibohay.
Mahimong mahilom ra ang init nga lalis. Kon magkauyon na unsaon pagbahin sa mga kawatunon pa.
* * *
- Latest
