EDITORYAL - Gun ban

Natapos na gyud ang Barangay ug Sangguniang Kabataan Elections, matud pa sa Commission on Elections naproklamar na ang tanang mga nakadaog, gawas lang niadtong mga nakadaog nga wala iproklamar tungod sa pending nilang suspension tungod sa nakaung-ong nga kaso. Atol sa election period, ang Comelec mimando og gun ban, bisan kadtong mga responsableng nanagiya og lisensiyadong armas dili makadala-dala niini ilabi na ang pagdala sa gawas sa panimalay gawas lang niadtong dunay gun ban exemptions.

Apan bisan pa sa pagpatuman niini, duna pa gihapoy 19 ka mga tawong nakalas tungod sa election-related violence sa tibuok nasud atol sa adlaw sa eleksyon,  ug laing 19 sab ang nangaangol sugod palang sa election period.

Kadaghanan niining pagpamusil nahitabo didto sa Bangsamoro Autonomous Region in Muslim Mindanao ug ubang dapit sa Mindanao.

Dili na kini ikahibulong didto tungod sa kadaghan sa mga loose firearms sa maong isla dala nasab sa presensiya sa sesesyonistang mga rebeldeng Muslim kaniadto ug mga teroristang grupo. Kaning mga natala nga election-related violence nga gigamitan og armas masabot nga politika ang motibo tungod sa higpit nga panagribal sa mga kandidato. Limitado ra sa bag-ohay nga nahuman nga eleksyon ang motibo.

Apan bisan pa dunay gun ban ug bisan asa adunay mga Comelec checkpoints naa gyud gihapoy makalusot nga nagdala-dala og armas. Dili lang kadtong mga goons o private armed groups sa mga politiko kondili hasta pud mga notado ug mga ordinaryong kriminal sama sa mga guns for hires ug mga tulisan.

Atol sa pagpatuman sa gun ban, daghan gihapong mga insidente sa pagpamusil nga nahitabo, daghan ang namatay ug nangaangol nga dili mga politiko o nalambigit sa politika ang motibo. Ang uban personal ug ang uban biktima sa mga tulisan.

Dili lang 38 ka tawo ang nabiktima aning mga nagtinil og ilegal nga mga armas atol sa election period kondili apil sab ang mga ordinaryong mga tawo. Mao nga usahay dunay mangutana kun epektibo ba gyud ang gun ban?

Maayo tingaling bisan wala nay eleksyon, ipadayon sa kapolisan ang paggukod anang mga loose firearms ug mga nagtinil niini, aron mamenusan pa gyud ang mga kaso sa mga krimeng naglambigit og armas.