EDITORYAL - Sea of Asia?

Dunay giduso nga sugyot ang Department of Justice nga ilisan ang pangalang West Philippine Sea ug himoon kining “Sea of Asia” o “Southeast Asia Sea” sa katuyoan nga makakuha og dugang suporta gikan sa ubang mga kanasuran sa umaabot nga pagpasaka og laing kaso sa Pilipinas batok sa China.

Ang tumong sa DOJ nga makaagni og dugang suporta sa kalibotan nunot sa planong pagpasaka og kaso batok sa agresibong gipanghimo sa China tungod sa kadaut nilang gihimo sa kadagatan didto.

Ang tumong usab niini nga makita sa kalibotan nga dili lang ang Pilipinas ang apektado sa pagpangdaro, reclamation sa mga coral reefs, pagpanguha sa mga takubo, polusyon ug uban pa nga tanan gibuhat sa China sa WPS.

Gustong ipabati sa DOJ ngadto sa ubang mga nasud nga dili lang kita, kondili sila usab ang maapektahan niini.

Partikular sa kasong isang-at batok sa China mao ang pagdaro nila sa ilawom sa kadagatan sa Panatag Shoal nga nakuhaan og video ug hulagway sa mga sakop sa Philippine Coast Guard.

Ang WPS usa sa mga lugar nga diin mosanay ang klase-klaseng isda nga molibud-suroy sa nagkadaiyang kadagatan sa kalibotan sa ilang pagdako. Busa kun ang mismong kadagatan diin sila nabuhi sa pagkagamay pa maguba, maapektahan sab ang fish stocks sa ubang parte sa kalibotan.

May punto ang DOJ, apan kinahanglang ang pag-ilis sa pangalan niini dili makapahuyang sa posisyon sa Pilipinas sa teritoryo niini.

Kay tinuod dunay posibilidad nga moisa ang kilay ug magduda na hinuon ang ubang mga nasud sa intensiyon sa Pilipinas nganong sa kadaghan sa mga nasud nga naa sa palibot sa “Sea of Asia,” ang Pilipinas ray nangusog, murag dunay gitagoang agenda.

Mas maayo nga klaro ug walay taguon sa kasong ipasaka, kay tinuod man gyud nga bisan usbon pa ang pangalan, dili mausab ang kadaut nga nahimo sa China diha sa WPS ug kini makaapektar gyud sa daghang mga nasud.