Ikakap-atan nga Adlaw

Mga Sakramental: Ang Medalyon ni San Benito

Sukaranang Teksto

“Didto ila siyang gilansang kuyog kaniya ang duha ka mga kawatan usa sa iyang tuo ug ang usa sa iyang wala. (Jn. 19;18)

Pasiuna

Nahimong kabahin sa atong kinabuhi isip mga Kristohanon ang Krus. Didto sa krus gibuntog ni Ginoong Jesus ang karaang kaaway nga mao ang yawa ang bitin nga nitintal ug nisulay kanatong mga tawo. Si San Benito (480-547 BCE) ang amahan sa Monasticismo sa Kasadpan ang dunay dakong debosyon sa Krus. Dinhi nagsugod ang pagkahimugso sa medalyon ug krus diin nakulit ang imahen ni San Benito kang kansang tuong kamot nagkupot sa krus ug ang wala nagkupot sa Balaod sa ilang pagkinabuhi kun Rule of Life.

Sa paglabay sa mga siglo dunay mga napuno nga mga kinulit diha sa medalyon. Anaa ang mga dagkong letra nga napatik sa maong medalyon. Sa hataas nga panahon wala masayri ang kahulogan niini apan niadtong tuig 1647 usa ka basahon ang nakaplagan didto sa monastery sa Atten Bavaria ug hisayran nga ang maong mga letra sinugdanan diay sa gamhanang mga pulong latin sa eksorsismo batok kang Satanas. Ug niadtong tuig 1880 ang monasteryo sa Monte Cassino agig paghandom sa ika 1400th nga adlaw nga natawhan ni San Benito ang nimando nga ang maong desinyo ug nasulat nga mga letra sa maong medalyon ang giisip nga opisyal sa tibuok orden ni San Benito.

Pagpalawom

A.  Ang Kahulogan sa Medalyon

1.  Sa atubangan nahimutang ang imahen ni San Benito nga nagkupot sa mahimayaong krus ang kristohanong simbolo sa kaluwasan. Sa iyang walang kamot gikuptan niya ang basahon sa balaod alang sa mga monasteryo nga mahimong langkubon sa pasiunang pulong nga: “Lakaw diha sa dalan sa Dios, ang ebanghelyo atong giya.

2.  Sa tuong bahin ni San Benito mao ang kupa nga gibutangan og hilo nga giandam sa mga monghe nga dunay laraw sa pagpatay kang San Benito tungod sa iyang hagip-ot nga balaod. Uban ang milagrosong paghimo sa timaan sa krus nahulog ang kupa ug napusgay kini. Sa iyang walang bahin mao ang uwak nga pinadala sa Dios nga nidala sa pan nga gibutangag hilo sa dautang pari gumikan sa kasina.

3.  Ibabaw sa kupa ug uwak ang ngalan sa medalyon Crux es Patris Benedicti (Krus sa Balaang Amahan nga si Benito) ubos niini nakasulat ang kasaulogan sa Jubileo sa ika 1400 nga sumad sa adlaw nga natawhan ni San Benito. Ang PAX nagpasabot man og Kalinaw ang panultihon orden nga Benedictino kaniadto pa.

B. Mga Pag-ampo diha sa Medalyon (Pangamuyo)

1.  CSSML- Crux Sacra Mihi Lux: Ang Krus mao akong Kahayag

2.  NDSMD- Nunquam Draco sit Mihi Dux: Ang dragon dili mahimong akong giya.

3.  CSPB- Crux Sancti Patris Benedicti- Ang Krus sa Balaang Amahan Benito.

4.  VRSNSMV- Vade Retro Satana Nunquam Suade Mihi Vana Sunt mala Quae Libas. Pahawa Satanas ayaw ako tentala sa imong kakawangan. Bisan unsa imong gitanyag Kanako dautan

5.  IVBB- Ipse Venena Bibas. , imna ang imong kaugalingong hilo.”

Kalihokan karong Adlawa

1.  Isul-ob ang medalyon apan seguroha nga nabendisyonan kini sa pari.

2.  Mahimong ibutang ang mga medalyon sa mga ganghaan sa mga lawak sa inyong panimalay.