Christmas cash gift

Pagkabasa pa lang nako sa ulohan sa balita: ‘P800 tubo sa suhol giduso’ nahaigking ko dungan ang paggakos sa dili masabot nga kalipay.

Taudtaod na man god miprotesta-nangayog increase sa ilang binulang suweldo ang atong mga mamumuo, pero gamay ra kay sa orihinal kantidad nga ilang gipangayo ang giaprobahan sa atong kagamhanan. 

Dili ikalimod, nga niining administrasiyon ni Presidente Bongbong Marcos, gilumsan sa grabeng sunodsunod nga pagtaas sa tanang presyo sa inadlaw’ng palaliton ang katawhan nga kanhi panahon sa kampaniya sa piniliay, iyang gipasaligan nga pabaratohon ngadto sa tag P20 ang matag kilo sa bugas.

Pero naunsa ba, nga miabot man hinuog P50 kapin?  Unya ang minimum salary sa atong mga mamumuo pila ra?

Sa National Capital Region, effective July 16, 2023 non-agriculture employees: P610, agriculture: P573, Service and retail establishments employing 15 workers or less: P573. Kini apil na ang P40-increase.

Samtang sa Central Visayas, P33 ray gi-increase sa Class A ngadto sa C nga lugar, diin ang suweldo sa mamumuo tag P420 ra ngadto sa P468.

 Ang pait, kay may mga empleyado, kinsa hangtod karon wala pa gayod makaabot og P400 ilang suweldo matag adlaw. 

Mao nga naintriga ko sa balita nga may ordinansang umentohan nag P800 ang suweldo sa mga mamumuo. Nagtuo ko nga para kini sa tanan. Busa makalipay. Apan dihang gibasa ko ang unod sa good news, pagsugod pa lang, mikunot na akong agtang.

Diay, para ra kini sa binuwang honorarium sa Clean and Green (CD) ug Barangay Health and Nutrition Workers (BHNW) sa dakbayan sa Mandaue, diin ang naandang suhol sa CD: P2,400 samtang sa BHNW: P3,300 ug molungtad lamang ang naasoyng P800-increase og upat ka bulan (Agosto 1 ngadto Nobiyembre 30, 2023.) Pagkatapos, ibalik na sa orihinal nga suholan.

Matud pa, gisayo ni City Councilor Immaline Marie Cortes-Zafra, pagpasa ngadto sa Konseho ning maong ordinansa, diin siya maoy author, aron kon mahimo na kining balaod, mahatag na nila ang P800-honorarium increae sa unang semana sa Disyembre isip advanced Christmas cash gift sa mga mamumuong hingtungdan. Nagpasabot ba kini nga sa Pasko may Christmas bonus sab sila?

Kaanindot kaha kon aduna. Segurado, madayon gyod ka-Happy ilang Christmas, Mayor Jonas.