Legalized corruption

Dili patas ang atong Kongreso. Bisan sa pag-aprobar og confidential fund (CF) sa mga ahensiya o institusiyon nga nagkinahanglan niini, sila namili. Kon ang hari sa Kongreso, kinsa maoy naggunit sa gikinahanglang pundo, walay maayong buot sa usa ka boutang lider nga mangangalagad, bisag Bise Presidente pa kini sa Pilipinas, ilang balibaran.

Ug mao kini ang nahitabo ni Vice President Sara  Inday  Z. Duterte-Carpio, kinsa bisan sa naatrasawo nang pagka-release sa 2022 Office of the Vice President P125M confidential fund, nagamit gihapon niya kini sa hustong paagi sulod lamang sa 11 ka adlaw.

Tungatunga na sa Disyembre 2022 nga nahatag ang CF, diin kon dili magasto hangtod sa kataposang adlaw, ibalik kini ngadto sa National Treasury.

Apan namontar na daan ni Inday ang kagamitan sa nahisgotang CF. Busa, pag-release niini, dali rang nagamit. Resibo? Gisumiter na sa OVP ang tanang gikinahanglan nga nahisubay sa pamalaod sa CF ug walay napalgang iregularidad ang Commission on Audit.

Unya sa kadalayegon sa gibuhat ni Inday, ang gihangyong OVP P650 million CF para sa tuig 2024, wala lang gibasura sa Kongreso, kondili, hasta ang CF sa siya pay mayor sa Davao City ipautingkay-audit usab sa Makabayan Bloc, kinsa panahon pa ni Tatay Digong, nabaniog nang rated CPP-NPA-NDF protectors? Pero karong Marcos time na, mao pay gidapigan ni House Speaker Martin Romualdez ug sa mga kongresista?  Pro-NPA na ba diay sila?

Sa makanunayong paglabayg lapok sa Makabayan Bloc ngadto ni Inday diha sa Kongreso, wala gyoy kongresistang mibaraw. Hinunoa, daw gikahimuot pa ni Martin. Talan-awon nga nakapasakit kaayo sa dughan sa mga kinabag-ang tarong ug nangandoyg kauswagan.

Samot na, si Tatay Digong gisakitan sab. Busa, gihagit tanang Kongresista nga ipa-audit pod ilang extraordinary expenses. Ug dili kay kang Inday rang CF. Buwahan, mahibaw-an, nga ang most rotten institution kuno kon korapsiyon nay hisgotan, walay lain, kondili ang Kongreso.

Gani, sa ilang extraordinary expenses or classified funds, ang liquidations ra by way of certification ang gikinashanglan ug wala nay resibong isumiter ngadto sa COA. Balaod nga hinimo sa Kongreso aron dili malili giunsa nila paggamit ang binilyong hinagoan sa katawhan?

Diin, kon atong palawman ang pagsabot, matawag nang legalized corruption. Luoya nato, sa?