Makiglumba sa China

Namahayag si Presidente Marcos nga magbuhat og 40 ka patrol vessels ang Philippine Coast Guard aron madugangan ang atong presensya diha sa West Philippine Sea taliwala ni’ng padayon nga agresibong lihok sa China sa maong lugar.  Magamit usab ang maong mga patrol vessels sa mga search and rescue operations ug mga disaster assistance nga panginahanglan.  Dako kini’ng tabang sa atong Coast Guard kon mahinayon.  Dili pa man tingale kita makasugakod makig-gubat sa China, apan makahimo na unya ang atong Coast Guard nga makig-dula og lumba-lumba ug gukod-gukod batok sa Chinese Coast Guard. Atala lagee!

Tin-aw ang pandungog

Gitawag ni kanhi Presidente Duterte ang Kongreso nga “labing dunot nga institusyon” human kini mihukom nga ang confidential funds ihatag ngadto sa mga ahensiya nga gitahasan sa pagpanalipod sa West Philippine Sea, lakip na ang confidential funds sa Office of the Vice President.  Gikahibulong ug gikasagmuyo sa mga magbabalaod ang pamahayag ni Duterte.  Gihulagway sa uban nga “sundot sa konsensya” ang maong reaksyon kay guilty kuno ang mga kongresista maong pasangil. Ni’ng reaksyon sa mga kongresista sa pamahayag sa kanhi presidente, daw haum ang panultihon nga “Tin-aw ang pandungog sa mga pasangil niadtong mga sad-an.” Muleeeng!

I-apil pagbuwad

Kasamtangan nga gipaundang una ang pagpamuwad og isda sa Sitio Bohol, Barangay Duljo-Fatima sa dakbayan sa Sugbo tungod sa mga basura nga nagtam-Ok ug nagtipun-og duol mismo sa buwaranan sa isda.  Gihatag ang maong kamanduan sa City Health Department human sa sugyot sa CCENRO ug Coastal Management Board. Pagkaon sa tawo ang buwad busa kinahanglan unta nga batonan ang kalimpyo sa paghimo niini.  Apan sa kahimtang didto sa Sitio Bohol, mitumaw ug mipasulabi ang kinaiya sa pagka-hugawan ug kamapasagaron.  Sugyot sa akong amigo, “Ni’ng ilang pagpasagad, angayan nga ang mamuwaray, i-apil na lang sad pagbuwad aron matibway.”  Fezteleeern!

Bisan anino, mobiya!

Gisaway ni Senador Cynthia Villar ang kinaiya sa mga opisyales sa nasud nga daw naanad na sa pag-angkat sa laing nasud sa atong mga panginahanglan.  Alang sa senador, dili pagpunay’g angkat ang sulbad kon dili ang pag-produce sa atong kaugalingon sa atong panginahanglan.  Natumbok sa senador ang suliran ug ang solusyon.  Dakong tinonto nga magsalig kita sa ubang nasud sa mga panginahanglan nga kaya ra unta nato’ng kab-oton ug buhaton.  Matud pa bitaw, “Dili maayo ang magsalig kanunay sa uban, kay bisan gani ang atong kaugalingon’g anino, mobiya man sa panahon sa kangitngit”.  Madahaan!

Mamalbal sa laing lugar

Gitugtan sa COMELEC ang PhilHealth nga ibalhin sa laing buhatan ang pito niini ka opisyal bisan sa nagsingabot nga Barangay ug Sangguniang Kabataan Elections.   “Loss of confidence” ang hinungdan ngano nga ibalhin ang maong mga opisyales tungod sa ilang ‘incompetence’, ‘gross negligence’, ug ‘ineffective leadership’.  Sa ka-dako sa ilang kasaypanan, makapahibulong ngano nga igo lang silang ibalhin.  Kon ung' pa kining maong mga PhilHealth officials, ang pagbalhin kanila igo lang naghatag kanila og bag-ong lugar diin adto na usab sila makapa-malbal.  Pagkatoytoy!