EDITORYAL - Tinagoang hulga sa apps

Nauso na sab karon ang pagpagwapohay ug pagwapahay diha sa social media gamit ang us aka matang sa application. Dili na kini bag-o kay naa na kini pipila ka tuig na ang nilabay ug daghan ang giganahan kay makalingaw para nila.

Apan ang pangutana, unsa ka secure ang mga personal nga impormasyon sa user ilabi na nga ang mga terms and conditions para sa mga gustong mogamit niini.

Kaning ubang mga applications gawas sa kadtong mga ginama gikan sa Uropa o sa Amerika, ang mas sikat kaayo ug maoy sagad gigamit sa Asya sama sa Pilipinas mao ang apps nga ginama sa taga Russia, China ug uban pang mga nasud nga dunay ekstensibong cyber surveillance systems.

Gani ang kaniadto FaceApp nga ginama sa Russia, nga makapausab sa dagway  sa users nakwestyon tungod sa kabalaka nga ipasa o ba kaha mapasa ngadto sa mga dautan ang mga personal nga impormasyon sa user.

Daghang mga apps nga makausab-usab sa dagway sa tawo, kini sama sa Cupace (Android 4.8) nga dunay face swap, text & sticker tools;  Aging Booth (iOS 4.5, Android 2.6) nga usa ka          aging tool; Meitu (iOS 4.8, Android 4.4) nga nakapokus sa makeup, teeth whitening, hair colors & styles face retouch ug kining pinakabag-o karon mao ang FaceLab (iOS 4.6, Android 4.3) nga diin mahimong butangan og bungot, balbas, bigote,  nga mga filters, aging tool, cartoon filters.

Walay dautan para sa mga inosenteng users ang paggamit niini. Apan walay nakahibalo kun unsay gamitan o katuyoan aning mga apps nganong mangayo sila og personal nga impormasyon sa mga users sa ilang applications.

Ikaduha, duna sab silay hatagan sila og access users sa uban pang mga impormasyon, mga videos, hulagway ug uban pa nga naa sa ilang social media accounts ug mahimo nilang kining ipasa o ipagamit sa third party.

Kaning third party maoy hanap nga bahin sa terms and conditions, kinsa may nakahibalo nga padung diay kini sa mga cyber criminals, mga scammers, ug uban pa?

Dili man sab tingali dautan kun magmatngon lang gyud ang netizens sa ilang paggamit aning mga uso o trending nga mga apps, basta importante nga dili sila mabiktima.