Mokuyanap ang smuggling

Namahayag ang chairman sa Samahang Industriya ng Agrikultura (SINAG) nga si Rosendo So nga adunay rice mafia nga nagpaluyo sa pagpaubos sa buhis sa mga imported nga bugas. Nanawagan usab ang SINAG sa pagpalagpot sa pwesto nila Finance Secretary Diokno ug Soci-economic Planning Secretary Balicasan kinsa giingon nga maoy nangusog aron mapakunhod ang buhis sa imported nga bugas.  Nagkadaiya ang argumento kabahin sa mga kaayohan o kadautan sa pag-imponer og buhis sa imported nga bugas.  Luyo niining tanan, angayang tamdan ang pagya-panahom nga,  Daghang ebidensya ang nagpamatuod nga kon patas-an nimo pag-ayo ang buhis, mokuyanap na hinoon ang smuggling.  Muleeng!

Pabalikon kay wa makat-on

Buot ipahunong sa teacher s group nga Alliance of Concerned Teachers (ACT) ang pagpatuman sa DepEd sa revised Grade 1 to 10 nga curriculum nga gihinganlan og  MATATAG.  Alang sa ACT, premature pa ang maong curriculum ug mahimo lang kini nga laing experimental education.  Mahinungdanon ang tukma nga curriculum aron matubag ang ginaingon nga nagkamaot na nga krisis sa edukasyon.  Kay matud pa bitaw,  kon ang bata dili makat-on sa atong pamaagi sa pagtudlo, magtudlo kita sa pamaagi nga makat-on ang bata.  Makapahinumdum sa estorya sa estudyante nga gipangutana sa inahan kon unsay iyang nakat-onan sa eskwelahan, mitubag ang bata nga,  mura g wala kaayo kay pabalikon pa man mi ugma.  Pagkatoytoy!

Goodbye  beep

Mokabat sa 58 ka unit sa Beep Cebu s modernized jeepneys ang mohunong na sa pagpamasada sugod karong Oktubre 1.  Molanat kining paghunong pagpamasada og unom ka bulan.  Nagkadaiyang rason ang gipadayag sa Beep sa ilang desisyon apan ang lintunganay mao nga alkanse na ang ilang operasyon.  Dili ikalalis nga ang ang paghunong unya sa Beep sa ilang pagpamasada maka-apektar sa mga sumasakay.  Kay magnihit na man ang sakyanan, tambag sa akong amigo sa mga pasahero,  Beep-fore you go, magbalon na lang og  corned beep  o ba kaha  beep-loaf , aron dili mapasmo.   Fishkots!

Dili tumanon ang instruction

Giawhag sa DTI ang publiko nga isumbong sa ilang buhatan kadtong mga rice retailers nga mopasaka gilayon sa presyo sa ilang baligyang bugas human motalikod ug mobiya ang mga inspectors sa ilang tindahan.  Tataw nga kulang sa respeto sa awtoridad ug sa balaod ang mga manindahay sa bugas ug maingon usab nato nga inutil ang DTI sa pagpatuman sa ilang mandato.  Ning kahimtanga, nausab na ang kahulogan sa DTI; inay Department of Trade and Industry, nahimo na nga  Dili Tumanon ang Instruction.   Madahaan!

Pwede ra itudlo

Sumala sa COMELEC, walay kandidato nga modagan karong 2023 Barangay ug Sangguniang Kabataan Elections sa kapin sa 500 ka mga barangay didto sa Bangsamoro Autonomous Region in Muslim Mindanao kon  BARMM. Ubos sa balaod adunay kagahum ang DILG sa pagtudlo og caretaker nga maoy mahimong molingkod isip opisyal sa lugar nga walay kandidato.  Hayan mao kana ang rason ngano walay nidagan.  Kay nganong modagan pa man nga pwede ra man diay itudlo. Menos-gastos pa.  Fezteleern!