EDITORYAL - LGUs wa molihok

Daghan ang nabuhi pinaagi sa bahandi ug grasya gikan sa kadagatan mao nga mahinungdanon kaayo nga kni ampingan ug dili abusaran.

Ang kadagatan naghatag og pagkaon sa dakong pahat sa populasyon sa Pilipinas.

Dinhi sa Sugbo, ang kadagatan sa Lapu-Lapu City ug sa silingan niining Lungsod sa Cordova, nalibutan og kadagatan.

Mao nga daghan sa ilang mga konstituwente, apil kadtong mga naa sa lagyong isla, ang nabuhi sa dagat.

Kaniadto sa dili pa kaayo higpit ang gobiyerno sa pagpatuman sa Fishery Code of the Philippines, nagkadaiyang ilegal nga panagat ang gihimo sa mga mananagat sa maong mga LGUs.

Pinaagi sa edukasyon ug implimentasyon sa balaod hinayhinay nga nawala kining dynamite fishing, cyanide, pino nga pukot, ug daghang pa uban.

Apan subo kaayong palandungon nga sa pagdagan sa mga panahon sukad nga giseryuso sa gobiyerno ang kampanya, hinay hinay napud namalik kining mga ilegal fishing activities.

Sa kadagatan sa luyong bahin sa Olango Island makita ang daghan pang mga isla nga gipuy- an og mga mananagat.

Apan sayo sa kabuntagon, normal na sab balik ang madungog nga laguno sa dagat, timailhan nga duna na puy namalik sa pagdinamita.

Kung subayon ang mga mabaw nga bahin aning mga islaha kun diin sila manginhas, mamana ug mamukot, nangaguba na kini.

Dili tungod sa dinamita, naguba kini tungod sa mga manginhas ug uban pa tungod kay ilang kawitan og kabilya ang mga buhing corals aron ukbon kay nangita sila og mga kinhason. Apan dili na ibalik ang corals hinungdan nga kini nangamatay.

Kung dili molihok ang LGUs, Bureau of Fisheries and Aquatic Resources ug Philippine Coast Guard batok niini, walay laing unang maapektahan kondili ang nanginabuhi sa dagat.