Duha ka alas ni Greg

Sa House hearing, giangkon ni Bucor Director General Gregorio ‘Greg’ Catapang nga tinuod ang nahitabo sa kalit nga pagkawala ni person deprived of liberty (PDL) Michael Catarroja sa National Blibid Prison. Diin nasayran hinuon nga kon unsay gidili ni kanhi BuCor Chief General Gerald Bantag kaniadto, karon gitugot na ni Greg.

Kon kaniadto bawal ang selpon, tablets, laptops ug uban pang gadgets sa komunikasiyon, karon puwede na maka-order online delivery ang mga PDL sa tumang kasayon tungod sa libreng wi-fi nga gimontar ni Greg para sa pinangga niyang mga binilanggo. Karaoke unit, mahjong table, bilyaran ug mga kubol namalk na sab sa Bilibid.       

Namahayag si Greg. Naluoy kuno siya sa mga PDL nga tungod sa kadaghan, ang uban anha na lang manghigda sa gawas, diin kon mag-ulan walay kapasilongan. Mao gyod kaha kini tinuorayng rason? Ang nakaporke, kay matod pa, dinagko ang mabayran sa kubol. Nga sa ato pa, aduna gyoy mga sungayan, ang nakakuwarta! Gumikan ning garapalang pagpananom og mga salawayon buhat sa Bilbid, gisukna si Greg sa mga kongresistang imbestigador, kon kaya ba niya kining pangibton-puohon? Diin, si Greg nagkapusngapusngang misaad: “Yes, your honor, I will do that!”

“Unya, ingkasog dili ka makahimo,” apas-sukna sa usa ka kongresista, “are you willing to tender your resignation?”

“I will not resign, your honor!” Pintok tubag ni Greg. Morag adunay gisaligan. Unya mipadayag: ‘Nga gawas kaha kon iyang duruha ka alas: Justice Secretary Boying Remulla ug Presidente Bongbong Marcos, kinsa maoy mibutang niya sa puwesto, ang momandong paresayinon siya, Ayha pa siya moresayin.’ Masabot sa sinultian ni Greg, nga wala siyay angay kahadlokan. Sanglit, iya ra mang gitrabaho ang mga butang nga sa iyang paminaw kahimut-an sa iyang mga amo. Total, kon wala sila makagusto niini, ipatawag ra man siya ug badlongon.

Sukad pagdala ni Greg sa BuCor kanunay na siyang nagpakita sa iyang kapalpakan. Ug hangtod karon, niining pagbuto sa PDL Michael Catarroja’s disappearance controversy, kinsa gituohang gipaeskapo, misamot kagabok ang kahuyang ni Catapang. Hagbay ra siyang gisuka sa katawhan. Apan, ambot, nganong na-in love gihapon niya si Boying ug PBBM? Tungod ba kay may panultihon: “Birds with same feathers flock together?”