Homeworks wad-on na

Nindot gyud kon maaprobahan kining gisugyot nga balaodnon nga idili na ang paghatag og homeworks ngadto sa mga tinun-an atol sa weekdays.

Base sa gisugyot nga balaodnon ni Senador Bong Revilla nga mahimong makahatag ang mga magtutudlo og homeworks apan ihatag kini Biyernes ug ipa-submit ini’g ka Lunes na.

Sa ingon nga paagi, dili makadali-dali ug dili kaayo mahasol ang mga tinun-an. Sayonan ka nga ang ubang magtutudlo mohatag og lisud kaayong homework/project sa hapon, unya ipa-submit ni inigkaugma?

Resulta, wa tawo’y kinatulgan ang bata kay magtukaw man kini hangtud sa kaadlawon. Nakasuway tawon mi niini kaniadto nga tabangan na lang namo ang among anak.

Aw, hinuon, ang among anak nga nakaagi og grabe kaayong homeworks nga kada adlaw gyud, usa na karon ka senior architect.

Kining balaodnon ni Revilla, kon maaprobahan, dili mahatagan og homeworks ang mga nagtungha sa Kinder ngadto na sa Grade 12.

Giklaro gyud ni Revilla nga kon ang maestra mohatag man og homeworks sa weekend, kinahanglan nga dili lisud himoon, ug mahuman lang sulod sa duha ka oras.

Unta mahimo gyud kini nga balaod.

* * *     

May duha ka polis nga nasakpang natulog ra sulod sa ilang patrol car atol sa ilang duty nga magpatrolya unta sa mga dapit nga sagad dunay manghitabo nga krimen.

Angay gyud sila nga silotan kay nagpakauwaw ra sila sa ubang mga polis nga nagtinarong sa ilang serbisyo. Dagko na kaayo ang sweldo sa mga polis karon, unya sila magtinapolan?

Sayonan ka nga gawas nga nangatulog, nag-andar pa ang makina sa police patrol car ug nagpa-aircon pa nga natulog. Matud pa sa uban, wa gabai!

Kon pananglit dunay gitulis diha sa unahan kanila, makaresponde ba sila dayon nga maayo man nilang pagka hinanok?

Awhagon nako si Koronel Ireneo Dalogdog nga maoy direktor sa Cebu City police nga siguroon gyud nga kasilotan kining maong mga polis, kay kon dili sila masilotan, makaingon ang uban nga way kapuslanan nga sila magtinarong.

Wa gyud maghunahuna kining maong mga polis nga mibalik na karon ang mga snatchers, mga holdupper sa pagpamiktima, ug angay unta sila nga mag-inabtik.

Isugyot nako ni Koronel Dalogdog nga ibalhin pagdestino kining maong mga polis diha sa “foot patrol duty” nga maglakaw nga magpatrolya sa mga dapit nga sagad anha mahitabo ang krimen.

Unya, dunay mga inspector nga mosusi kanunay kon sila nagtinarong ba sa pagtuman sa ilang tahas. Kon mosipyat nga magtinapolan na sab, aw angay na gyud silang taktakon sa serbisyo.