Hazing

Mitumaw na usab kining mga insidente sa hazing sa mga fraternity bisan pa man niining kasamtangang balaod nga nagdili niini human sa mga kaso sa pagkamatay atol sa initiation sa nakalabay nga mga dekada.

Didto sa kaulohan, giinbestigar karon sa otoridad ang pagkamatay si John Matthew Salilig, usa ka chemical engineering student sa dakong unibersidad sa Metro Manila, atol kuno sa initiation sa usa ka inilang fraternity dili pa dugay.

Sa maong inbestigasyon, nahibaw-an usab nga adunay laing kaso sa hazing dinhi mismo sa Sugbo nga nahitabo sa niaging tuig. Susama usab kini sa nahitabo sa kaulohan diin namatay usab ang biktima sa hazing kinsa tinun-an sa University of Cebu.

Hinuon misurender ngadto sa Cebu City Policer Office ang upat sa lima ka mga suspek sa maong insidente. Apan gipapauli sila human sa interogasyon gumikan kay wala pa may kaso nga gipasaka batok kanila.

Ambot ngano nga bisan pa man sa Anti-Hazing Act, daghan pa man gihapon ang mga kaso sa fraternity initiation nga naglambigit og grabe nga pagdagmal nga mosangpot usahay sa kamatayon sa mga mosulod sa mga grupo.

Ang problema man gud mao nga gibaliwala lamang sa ubang fraternity ang Anti-Hazing Act tungod lagi kay naanad na sila nga ipailalum gayud kadtong mga mosulod sa ilang grupo sa bunal ug sa uban pang klase sa hazing.

Ang dakong problema usab mao nga dili responsible ug kulang sa seminar kining mga opisyal sa mga fraternity nga nagpahigayon pa gihapon sa hazing bisan pa man sa balaod nga nagdili niini. Angay gayud sila nga gukdon sa otoridad.

Angay lamang nga manubag kadtong mga nalambigit sa hazing nga misangpot sa pagkamatay sa maong mga tinun-an. Ug angay lamang silang silotan aron kahatagan usab og hustisya ang mga pamilya sa mga bitktima.