Ambot pila ray magpabakuna
600 ka doktor, nurses ug ubang health care workers sa Vicente Sotto Memorial Medical Center, nga pangulohan nilang VSMMC Medical Director Dr. Gerardo Aquino ug Heneral Mel Feliciano sa Inter-Agency Task Force, ang magpatusok ugma sa bakuna sa Sinovac sa China.
Ang mga magpabakuna 20.66% ra sa 2,904 ka kawani sa VSMMC nga nisugot nga magpabakuna sa Pfizer/BioNTech nga maoy gipahibawo nga unang moabot niadtong Pebrero 15. Samang panagana ang gihuptan sa kinabag-an sa health care workers ubang mga ospital sa nasud.
* * *
Pasiuna pa lang ang 7,200 ka doses sa CoronaVac nga nitugpa sa Mactan Cebu International Airport gahapon sa buntag.
Nisaad si vaccine czar Carlito Galvez nga may dugang pa nga 44,8000 ka doses nga giandam alang sa Kabisay-an.
Kon mahinayon ang pagbakuna sa 600 ugma, ang pasiunang suplay igo rang makabakuna og dugang 3,000 ka health care workers sa Sugbo ug Kabisay-an.
Gawas kon mohatag sila sa unang dose para sa tanan nga moboluntaryo ug ang ikaduhang dose, duha ka semana gikan karon, kuhaon gikan sa umaabot pang suplay.
* * *
Gipahibawo ni Galvez giunsa nila pagbahin ang 600,000 ka doses nga donasyon sa China:
- 432,000 ka doses (72%) para 216,000 ka pasyente sa Luzon nga maglakip sa Metro Manila, Baguio City, Ilocos, Cagayan Valley, Central Luzon, Calabarzon, Mimaropa ug Bicol;
- 52,000 ka doses (8.67%) para sa 26,000 ka pasyente sa Sugbo;
- 48,000 ka doses (8%) para sa 24,000 ka pasyente sa Davao; ug
- Ang mahibilin nga 70,000 ka doses para sa 35,000 ka pasyente i-reserba para sa dinaliang panginahanglan.
* * *
Di katuohan si Health Secretary Francisco Duque nga mangumbinser sa mayoriya sa health care workers nga way salig sa Sinovac.
Kay siya mismo nagpasalipod sa iyang edad, 64. Makapasamot ang wa pagpabakuna ni Presidente Rodrigo Duterte, 75, human gipahibawo nga magpatusok siya sa Lung Center of the Philippines, human sa nahaunang pag-insistir nga magpabakuna sa Sinopharm, di sa Sinovac.
Mao tingaling wa mo-boluntaryo pagpabakuna sa Sinovac ugma ang duha ka kinatas-ang opisyal sa Cebu City, silang Mayor Edgar Labella, 69, ug Bise Mayor Mike Rama, 66.
* * *
- Latest
