Disiplina kinahanglan batonan sa mga bikers

Sa kalisod sa public transportation karon gumikan sa pandemic kalbarya kaayo sa mga tawo ilabi na kadtong walay kasakyan ang pag adto sa dapit nga ilang adtoon ilabi na sa mga trabahoan.

Busa dako kaayo og ikatabang ang mga biseklita aron medyo madali ang biyahe itandi sa magbaklay nga abtan og siyamsiyam ayha maabot sa padulngan kay duha ra man intawon ka tiil ang magpulipuli sa paglakang.

Midagsa na sa karsada ang mga nagbisekleta. Pwera sa mga bikers nga buotan, na gyuy mga bikers nga labad kaayo nga nagtuo nga exempted sila sa balaod sa trapiko.

Ang uban dili magpadaplin magsige pa og tabi sa katapad nga biker, samtang ang uban dili motuo og traffic signal sama sa nahitabo sa dakbayan sa Talisay nga nabanggaan sa nagmotorseklo kay nagpaturagas lang sa paglabang bisan og ‘go signal’ na sa pikas.

Makaingon ta nga iresponsable ang ingon niini nga batasan sa mga bikers. Gani sa tulay sa Mactan gidid-an na ni sila kaniadto nga magsakay sa bike diin gikinahanglan nga magbaklay sila bitbit ang bike kong moagi sa tulay.

Apan wala na ni karon kay makiglumba sila sa mga sakyanan nga de ligid ug de makina nga delikado para nila. Gawas pa, makaamong usab sila sa ubang motorista nga mao na hinoon ang masad-an.

Kinahanglan sabton nato ang usa’g usa nga dili ang tanan mo-adjust sa uban kay pareho kita nga adunay katungod nga moagi sa karsada pero gikinahanglan duna kitay kaakohan.

Ang importante natong tan-awon ang atong safety aron malikayan ang disgrasya.