EDITORYAL - Tsimosa ug tsismosa isip contact-tracer?

Kataw-anan ug may pagkapilyo. Ingon ani mahulagway ang planong paggamit sa mga ‘tsismosa ug mga tsismoso’ isip contact-tracers sa gipangusgang contact-tracing sa kapolisan sa kampanya batok novel coronavirus disease.

Si PRO-7 Director Agustus Ferro miingon nga dunay lugar didto sa Luzon nga migamit niining mga tawhana isip tinubdan sa impormasyon kun kinsa ang mga uwahing nakauban sa mga nagpositibo COVID-19 diha sa usa ka komunidad .

Dili na mawala sa komunidad sa mga Pilipino nga duna gyuy mga himantayon ug tabian nga mga silingan. Sa uban inamiga o inamigo ra ang tumong apan ang nakaparat, sumsoman man nla ang ubang tawo hinungdan sa panag-away-away.

Sila maoy nakaingon nga adunay trabahuon kanunay ang mga miyembro sa Lupon ng mga Tagapamayapa ng Barangay.

Dunay mga netizens way lingaw ang mikomento nga mas maayo nalang kini kay mas mapuslan pa ang pagkatabian sa ilang mga silingang tsismosa ug tsismoso nga walay laing gibantayan kondili ang uban.

Kataw-anan ug makadismaya. Mao kini ang pagtan-aw sa uban bahin sa maong plano. Ang mga tsismosa ug tsismoso diha sa mga komunidad maoy labing gikalagotan sa mga managsilingan.

Kasaligan kaha ang impormasyong ilang mahatag? Basin unya og ang mga kontra nga silingan ra ilang ipangsumbong.

Apan karon kun sila maoy himuong informers sa gipangusgang contact-tracing, di ba kaha makamugna hinuon kini og kasamok tali sa mga managsilingan unya magusik-usik lang og panahon ang mga otoridad pag-validate sa ilang mga impormasyon?

Unsaon nalang kun ang mga tsismosa ug tsismoso nga maoy sigeng manumbalay maoy nagpositibo o ba kaha nakatabi sa nagpositibo sa COVID-19? Kinsa may mosumbong nila?

Unsa man diay gamit sa mga opisyales sa mga barangay? Ang mga purok leaders?  Unsa may gamit diay ani nila tigpatapok lang sa mga botante kun hapit na ang eleksyon?

Di ba diay sila mahimong molihok  o mandoan aron pagtabang og monitor  ug mo-trace sa ilang mga konstituwente kun kinsa kadtong mga gituohan nilang kataposang nakauban sa mga nagpositibo sa virus?