Sa bukid layo ang kasakit

Sa dihang wala pay COVID-19, daghan sa mga tawo ang buot magpunsisok sa dakbayan kay lagi anaa man didto ang daghang mga kalingawan.

Dinhi sa probinsiya mingaw ug malinawon ug kun kontento ka sa imong kinabuhi nan, dali alang nimo ang pag adjust.

Sa akong bahin, salamat sa Ginoo nga nia ko ron nadestino sa probinsiya sa may Madridejos, Alegria. Tinuod mga duha ka buwan kapin nga wa nako kakita og dakbayan ambot lang kaha tong akong mga bayranan. Ang nakanindot lang mao nga gawasnon akong maligo sa dagat kun buot gyud sanglit anaa raman kini sa akong tugkaran.

Sa dihang normal pa ang dagan sa kinabuhi ug nahimo kitang gawasnon sa tanan natong gipanghimo, wala nato makita ang bili sa mga yanong kalipay ug sa mga yanong panginahanglan sa atong kinabuhi. Kini tungod kay daghan nato ang nasilaw sa mga panginahanglan sa sentido apan nahikalimot sa panginahanglang espirituhanon ug emosyonal.

Mao nga tungod niini daghan ang nahimong salingkapaw diha sa pagpaningkamot nga malipayon ug matagbaw.

Apan sa kaulahian ang tanan nahimong walay ayo tungod kay wala man nila gihatag kanato ang tinud-anay nga kalinaw. Kalingawan tingali anaa apan ambot lang sa kalinaw.

Sa laing bahin, anaa sa bukid ang kahimsog kay ang mga utanon ingon man ang preskong hangin ug limpiyo nga tubig anaa man dinhi.

Pwera na lang tingali kun walay tubig. Ang mga tawo dinhi matinud-anon ug simple ang kalipay nga gipangita.

Mao nga ang pangutana mao asa ang mas mahinungdanon ang kalampusan o ang kalipay? Ang kinabuhi ba o ang bahandi? Ang salapi o ang tawo?

Kini ang mga pangutana nga angayan natong tubagon ning panahon sa dakong pandemic.

Kay kun dili kita maantigo mo prioritize sa atong gusto kalabot sa bisan unsang accidental batok sa bisan unsang substantial, nan pabiling haguka ang atong panaw sa kinabuhi mga higala.

Ning panahon sa pandemic ang bugtong paagi nga makapalingkawas nato gikan sa daghan pang kalisdanan mao man ang atong paghangop sa kamatuoran ug dili lang sa pagpunay og paminaw sa mga huraw nga way sukaranan.

Kun ang usa ka pangulo nagpaabot og pagtahod kinahanglang iyang ipakita nga angayan siya niini.

Sa bukid layo ang kasakit kay nahimong anad na ang kadaghanan sa kalisod.