EDITORYAL - Pagkolekta di paigo

Dunay mga indibidwal sa Dakbayan sa Sugbo ang gipamulta ug may usa ka barangay kapitan na ang gipatawag sa Cebu City Environment Natural Resources Office (CCENRO) nunot sa matud pa wala nila pag-mentinar sa kalimpyo sa ilang mga dapit.

Ang pangulo sa CCENRO nga si John Jigo Dacua miingon sa report nga 500 na ka mga tawo ug mga establisamento ang naisyuhan og citation tickets ug sa iyang banabana moabot na og tunga ka milyon ka pesos ang multang ilang nakolekta tungod niini.

Apil sa mga giisyuhan og mga ticket ang mga panimalay nga way kaugalingong septic tanks kansang hugaw gikan sa kasilyas direktang gipadagayday padung sa sapa diha sa ilang dapit.

Ang basura nga wala tarunga og hipos ilabi na ang mga plastic adto mapunta sa mga kanal nga modiretso sa mga sapa ug molahos sa dagat.

Gani ang Pilipinas ikatulo sa tibuok kalibotan sunod sa China ug Indonesia nga nagtam-ok og plastic nga basura diha sa kadagatan.

Kining tanan mamenus-menusan kun gituman ug diniyos nga giimplimentar ang Solid Waste Management Act of 2000 nga diin ang tanang lokal nga mga lider partikular ang mga mayor ang gitahasan paghimo og mga programa sa pagkolekta sa mga basura.

Sila nay motahas sa mga barangay kapitan sa pagbuhat niini diha sa ilang tagsatagsa ka mga barangay.

Apan bisan pa man unta og malimpyo ug mahapsay ang mga barangay, kinahanglan nga dili lang kutob sa pagkolekta ug pagpamulta kondili hasta ang higpit nga pagbahig sa basura diha mismo sa mga kabalayan.

Kay una sa tanan, ang mga residente maoy tinubdan sa basura, kada adlaw nigamit sila’g mga produktong  gisulod og single use plastics sama sa sabon, asukar, shampoo, kape, ug daghan pang uban.

Kun diha palang gitarong na, wala nay manglutaw nga basurang plastic diha sa kadagatan sa Sugbo.