Ang JFN nga ordinansa

Dunggon karong ala-una sa hapon ang ordinansa nga gipangamahanan ni Cebu City North District Councilor Atty. Raymond Alvin N. Garcia nga gitawag og Jose F. Navarro Ordinance ang ordinansa nga naghatag og benepisyo sa mga pinili nga opisyal sa barangay sa dakbayan sa Sugbo nga magretiro na sa ilang katungdanan.

Ang ordinansa gipangalan sa kanhi Barangay Kapitan sa Punta Princesa nga si Jose Navarro nga nagserbisyo isip pinili nga opisyal sa barangay sulod sa 53 ka tuig apan bisan usa ka dako wala gayoy nadawat nga benepisyo sa iyang pagretiro sa serbisyo.

Sigun niining maong ordinansa ang tanang pinili nga opisyal sa Barangay nga nakaserbisyo og usa ka tuig makapahimulos na sa retirement benefits ug kun sila mamatay ang ilang legal nga mga sumusunod mao ang makadawat niini.

Ang ordinansa nagkanayon nga ang kwalipikadong mga piniling konsehal sa Barangay makadawat og tag tulo ka libo ka pesos (P3,000.00) sa matag tuig nga siya nagserbisyo ug ang mga Kapitan makadawat usab og tag lima ka libo ka pesos (P5,000.00) sa matag tuig niining pagserbisyo sa Barangay isip Barangay Kapitan.

Ang unom ka buwan nga pagserbisyo gikonsiderar usab sa ordinansa nga usa ka tuig ug ang mga tuig ug buwan nga suspendido ang piniling opisyal sa barangay dili apilon sa pagkuwenta sa iyang benepisyo sa pagretiro.

Sigun gihapon sa ordinansa dili makapahimulos sa Retirement Gratuity Benefits ang mga piniling opisyal sa barangay nga gitangtang sa katungdanan ug ang mga nakapahimulos na niini bisan pa man og mibalik sila sa pagserbisyo isip pinili nga opisyal sa barangay.

Ang mga opisyal sa Barangay Councilors League of the Philippines Cebu City Chapter nga gipangulohan sa Presidente niini nga si Kalunasan Barangay Councilor Carlitos “Litoy” E. Ceniza nagkahiusa sa pag awhag sa mga sakop niini nga konsehal ug sa mga kapitan sa pagsuporta sa ordinansa aron kini mapalabang, maaprobahan ug mapatuman.