Ang opening sa CTU Malabuyoc

Daghang mga estudyante nagkapundok sa dihang miabot ang panahon nga klase nila pagasugdan na. Klase na gyud alang sa CTU MALABUYOC Extension. Duna koy estudyante nga gipatungha didto Faith iyang ngalan mao nga ako siyang giubanan sa bag-o niyang tunghaan.

Samtang ang uban nagduwaduwa og mga GTKY games, siya nagsud-ong lamang. Ako siyang gipangutana kun nganong wa siya moapil siya mitubag nga kiwaw alang niya ang makigsagol sa mga kabatan-onan nga wala niya mailhi.

Hinuon angayan lamang nga sabton siya kay di baya tuod lalim nga mamahimong moapil dayon sa mga panagpundok sa katawhan nga wala nimo mailhi. Hinuon ako siyang giingnan nga sa kadugayan maanad ka ra, ang pagsugod lamang maoy lisud. Anaa gyud nang cultural barrier matud pa.  Anaa gyud nang kahadlok labina kun dunay laing moabot nga bag-ong hitabo sa kinabuhi natong mga tawo. Ang transition usahay kalbaryo alang sa matag usa kanato. Ang transition usahay nahimong hulga sa atong seguridad ug sa atong comfort zones.

Apan matag transition mamahimong tinubdan sa inspirasyon. Sama sa akong kasinatian karon. Bag-o kaayo ko ning dapita apan ning maong kabag-o nako dako ang akong paglaum nga ning maong matang sa kahimtang duna kitay mamahimong maayo ug mabungahon alang sa uban. Bloom where you are planted, matud pa nila.

Sa among pagpamauli ako siyang giingnan nga ayaw lang og kabalaka. Kining mga butanga moagi gyud sa atong kinabuhi ug normal nga dunay transition ug pagbalhin balhin nga mahitabo.

Ang mahinungdanon mao man ang imong maayong kaugmaon luyo ning maong nagkausab usab nga panahon. Everything is possible labina kun anaa ang pagtuo nimo sa imong kaugalingong katakos.