Re-blocking

Wala pa gani ang summer miarangkada na ang mga sunog dinhi sa Sugbo.

Gani, gikan sa bulan lamang sa Disyembre sa niaging tuig ubay-ubay na ka sunog ang miulbo dinhi sa Dakbayan sa Sugbo ug silinganang mga lugar.

Sa ulahing duha ka sunog, upat ka tawo ang namatay sa managlahing mga insidente didto sa dakbayan sa Lapu-Lapu ug sa Barangay Duljo Fatima ning Siyudad sa Sugbo kaniadtong Sabado sa gabii ug Domingo sa buntag.

Dili gayud kalikayan ang sunog.

Sama kini sa kawatan kun moigo, sikreto ug wala gyuy timailhan pagtumaw.

Mao na nga kun moulbo na gani ang sunog, iIabina sa lugar nga daghang kabalayan, dili gyud malikayan ang dakong danyos.

Apan kay dili man lagi kapugngan ang sunog, unsa may buhaton sa komunidad ug sa lokal nga kagamhanan batok niini?

Basta moulbo na gani ang sunog, daghan ang magkapuliki’g ampo nga dili unta kini mokatap ug mougdaw og dako nga danyos.

Hinuon tungod sa kahagip-ot sa kadalanan, maglisod gayud ang mga bombero ug ubang mga rescue volunteers pagresponde.

Kini gawas sa guba o kakulang sa mga fire hydrants nga dako unta og ikatabang sa mga molupyo pagpalong sa kayo.

Alang kanako mas maayo siguro nga mopatuman og re-blocking ang lokal nga kagamhanan sa tanang urban areas sa siyudad diin adunay risgo sa sunog.

Kini aron nga dali ra unya ang pagresponde sa otoridad pag-ulbo unya sa insidente.

Ang naandan man gud sa lokal nga kagamhanan sukad pa sa nanglabay nga katuigan mao nga ayha ra kini mopatuman sa re-blocking human sa mga insidente sa sunog nga daghan na ang kabtangan nga naugdaw ug kinabuhi nga nakalas.

Apan nganong mopaabot pa man kita og daghang kabalayan ug butang – ug kinabuhi – nga maugdaw ayha pa ang re-blocking?

Nganong dili man unahon ang re-blocking isip panagang sa pag-ulbo unya sa sunog?

Sa ako nang gikaingon, dili gayud nato matag-an ang pag-ulbo sa sunog.

Sama kini sa kawatan kun mo-strike. Ug angay lamang nga ipatuman na kining re-blocking sa tanang huot nga lugar aron dali ra unya ang pagresponde atol sa sunog.