Mga kaayohan sa ‘Cream of Tartar’ (1)

Tingale nabag-ohan ka niini nga tema, nga ato karon ipresentar, kay nakaseguro ko nga daghan pa ang wala makadungog ug makahibalo sa kutay sa daghang mga kaayuhan nga mahatag sa “cream of tartar”. Naa ni naka-display sa mga grocery o sa supermarket diha sa estante sa mga lamas (spices section).

Sagad sa uban, kadtong mahiligon sa pagluto og tinapay o pan, cakes ug ubang produkto sa panaderia, mag-uban nga ingrediyente ang “cream of tartar” ug “baking soda”, isip pampatubo ug pahumok sa lutoong pan ug uban pa. Kay unsa man gyud kini nga “‘cream of tartar”, sama ba kini sa “tartar sauce” – dili kay lahi kini.

Segun sa “The Kitchen”, ang “cream of tartar”, usa ni ka asidik nga aslum tagamtamon, gikan sa produkto o permentasyon sa grapes (ubas) aron himoon nga bino (grape wine). Diin ang linugdang sa gisuka (fermented) nga grapes, gi-purify kini nga nahimong pulbos nga puti (white powder).

Kini maoy gihimo nga prinsipal nga ingrediyente sa produkto nga “cream of tartar”, nga sa generik ginganlan kini og “potassium hydrogen tartrate”.

Unya, nasayud ba kita nga daghan sab kini og kagamitan nga kapuslan nga kaayuhan alang sa atong panglawas?

Hinuon, una ta mogamit niini, kun duna tay dili maayo nga gipamati sa tiyan o sa kidney, maayo nga mobisita sa imong doktor aron kahatagan ka og opinyon basig moalkontra sa imong medikasyon.

Unsay mga benepisyo nga mahatag niini? Atong sundan ang mga mosunod:

* Makahupay sa artraytis – Si Ted Harper, sa Eric Bakker, N.D.’s website, nipaambit sa iyang milagrosong resipe, gikan sa natibo’ng Australyano.

Ang sagol naglakip sa orange, grapefruit, lemon, Epson salt, tubig ug cream of tartar.