Paspas nga hinabang

Maayo na lamang nga wala mitadlas ang bagyong Ompong dinhi sa Kabisayaan, ilabina sa lalawigan sa Sugbo. Apan subong palandungon tungod kay makaluluoy usab ang atong kaigsuonan nga naigo gayud sa maong kalamidad.

Si Ompong maoy labing kusog nga bagyo nga mihapak sa nasud karong tuiga.

Apan aduna pay mga bagyo nga gituohang moabot sa nasud sa umaabot nga mga bulan. Sa ato nang nasinati, mokusog ang mga bagyo basta maghinapos na gani ang tuig.

Hinuon misibat na si Ompong sa nasud. Apan nagbilin kini og dako nga danyos ug mikalas og pipila ka kinabuhi. Matud pa sa taho, walo ka probinsiya didto sa northern Luzon nga gikusokuso sa bagyo ang naputlan og kuryente karon.

Hinaut nga dali rang makabangon ang liboan ka mga nabiktima sa maong kalamidad. Dili lalim ang mawad-an og kabtangan.

Samot na nga dili gayud lalim ang nawad-an og mahal sa kinabuhi panahon sa katalagman.

Ug hinaut nga paspas usab ang hingtungdang mga ahensiya sa kagamhanan pagresponde sa mga nabiktima ni Ompong. Halapad ang lugar nga naigo sa maong bagyo ug nga kinahanglan nga paspas usab ang relief operations sa gobiyerno.

Naleksiyon na kita sa nangaging nga bagyo diin hinay ang tabang gikan sa kagamhanan ngadto sa mga biktima.

Gani mas paspas pa ang mga grupo sa pribado nga sector sa ilang pagtabang sa mga biktima.

Kasagaran gayud kini nga nasinati panahon sa kalamidad, bagyo man ug linog.

Gani, niadtong paglapdos ni supertyphoon Yolanda, hilabihan ang bagulbol sa mga biktima tungod sa ka dugay pagresponde sa mga ahensiya sa kagamhanan.

Tungod lagi sa burokrasya sulod sa gobiyerno mao nang hinay ang pagbiyahe sa mga hinabang.

Apan hinaut nga naleksiyon na usab ang atong mga opisyal sa kagamhanan. Nga kinahanglan alerto ang tanan aron dili usab mograbe ang sitwasyon sa mga lugar nga naigo sa kalamidad.

Dali ra nga makabangon ang mga biktima sa kalamidad sa ilang kahimtang kon dali ra usab nga maabot kanila ang tabang.