EDITORYAL - Polis ra diay ang mga killer?

Napamatud-an na gyud ang dugay na kaayong pagduda nga mga polis ra ang naghimo sa ubang pagpamusil dinhi sa dakbayan, human mapatay kagahapon ang usa ka polis ug nadakpan ang lain niyang kauban nga misuway unta pagpatay ni Tejero Barangay Konsehal Jingjing Cadungog.

Nagdagan ang sakyanan ni Cadungog paingon sa usa ka hotel sa North Reclamation Area (NRA) kay motambong unta siya sa eleksiyon pagpili og mga opisyal sa Association of Barangay Councils (ABC), apan gipusil kini sa tawo nga nag-angkas sa usa ka motorsiklo. Wala maigo si Cadungog ug nakabawos pagpusil ang iyang mga bodyguard ngadto sa mipusil kanila.

Samtang napatay ang tawo nga namusil sa sakyanan ni Cadungog, ug nadakpan sa ginukdanay ang kauban niini nga misuway’g ikyas, nakurat ang mga bodyguard ni Cadungog kay nasuta nga mga polis diay ang ilang napatay. Nasuko si Mayor Tomas Osmeña kay ang dinakpang polis nga gitanggong na unta sa Waterfront Police Station, abtik nga gikuha dayon sa mga sakop sa PNP Criminal Investigation and Detection Group (CIDG)-7.

Nagtuo na gyud si Mayor Osmeña nga gawas sa pagtinguha pagpatay kang Cadungog, daghan pa nga mga pagpamatay nga nahitabo dinhi sa dakbayan mga binuhatan kini sa kapolisan, ug posible nga nalambigit usab niini ang CIDG. Apan dunay lahi nga pagpasabot ang kapolisan kay kuno nag-surveillance lang ang duha ka polis, diha nga giunhan sila pagpusil sa mga nagsakay sa sakyanan ni Cadungog.

Kinahanglan gyud nga ayuhon sa kadagkoan sa kapolisan ang pagpasabot kabahin niining maong isyu, aron ang katawhan dili maglagot sa mga polis kay imbes nga panalipdan nila ang katawhan, sila man diay maoy naghimo sa sagunson nga pagpamatay. Wala pa gyud masuta kon ngano nga buot man nga patyon si Cadungog sa duha ka polis.