Nitapon sa BOPK

Matud pa sa panultihon, “Only fools don’t change.” Mao kini ang akong ikahulagway sa nakab-ot nga hukom sa bag-ong napili nga si Kapitan Freddie Esmas sa Barangay Day-as, nga mibiya sa Team Rama ug mibalhin sa BOPK uban sa pipila ka konsehal sa barangay.

Hinuon, agi’g pagbaton og hustong pamatasan, iyang giduol si Bise Mayor Edgardo Labella, ang naggunit sa bandera sa oposisyon, ug nananghid nga motapon na siya sa pikas.

Dili sayon ang gihimo ni Kap Esmas. Dili malikayan nga aduna gyu’y mga kasingkasing nga masakitan kay ang iyang gibuhat sama ra sa usa ka amahan nga mibiya sa iyang asawa kuyog sa mga anak aron motipon og bag-ong kapikas. Mao nga wala gyod siya makaipsot sa ubay-ubay’ng pangutana nganong nakadesisyon man siyang mobalhin?

Ug ania ang pulido niyang tubag nga nakapatak-om sa mga mausisahong hunahuna: “Nakahukom ko sa pagbalhin tungod kay ang interes sa katawhan sa Barangay Day-as, anaa na sa BOPK.” Pagkanindot nga rason! Alang nako, usa ka dalaygong hukom. Ngano?

Tungod kay wala diay soloha ni Kap. Esmas ang hukom. Awhag diay kini gikan sa kinabag-ang lumolupyo sa ilang barangay, kinsa may nakita tingali nga kahayag sa kauswagan alang sa ilang baryo kon mobalhin sila pagpasilong sa landong sa BOPK, kay sa magpabilin sa poder sa Team Rama.

Kini nagpaila lang nga si Kap. Esmas usa ka maayong lider nga kaantigo maminaw sa mga sentimento, o sugyot sa katawhan. Dili sama sa nausong slogan ni kanhi Presidente PNoy panahon sa iyang administrasyon nga ambot, hasta kapila kaha niya balikbalika:

“Mga mamamayan, kayo ang boss ko!” Pero wala gyud ta’y nakita, nga gituman ni PNoy ang iyang gisulti. Kanus-a ba gisugo sa mga kabus si PNoy, unya ang maong sugo iyang gituman?

Sa taga Day-as,  Congratulations! Wa mo masayop pagpili ni Kap. Esmas kay sa paglingkod pa lang niya, nagpakita dayon og maayong labok sa pagpangalagad.