Pagdating sa tax, si ‘Juan’ ang nagpapasan
PAGDATING sa isyu ng buwis, laging talo ang ordinaryong mamamayan.
Ang maliliit na empleyado, bago pa man tanggapin ang paycheck, kinaltas na ng opisina ang buwis na dapat bayaran. Yung mga big corporations, kayang-kayang dokturin ang kanilang mga book of accounts para mabawasan nang malaki ang buwis na binabayaran. Yung iba nga, tulad ng naging kontrobersyal na kompanya ng sigarilyo ay nameke pa ng mga tax stamps para dayain ang pamahalaan ng bilyun-bilyong halaga ng buwis.
At sa tuwing maglulunsad ng bagong buwis ang pamahalaan, palaging ordinaryong tao ang apektado. Halimbawa, kapag tinaasan ang buwis para sa mga produkto, tataas din siyempre ang presyo ng mga ito at ang consumers ang nagpapasan ng bigat. Pati ang pagkain sa mga restawran na dinarayo ng mga karaniwang tao ay tumataas kapag may dagdag na value added tax.
Sa mga oligarchs at malalaking kompanyang mandaraya sa buwis, nagbigay ng babala si Pangulong Rodrigo Duterte nang sabihing papaokupa niya sa sambayanang Filipino ang mga lupaing pag-aari ng mga oligarchs na hindi nagbabayad ng tamang buwis. Maganda iyan kung kayang totohanin ng Pangulo. Pero sabi nga ni Presidential Spokesman Ernesto Abella, “It is only a warning. Babala lang.
He will take certain steps to make sure that the erring parties will respond. President is serious to the matter that government properties need to be returned,” wika pa ni Usec. Abella ukol sa pahayag ng Pangulo na pag-occupy ng mga Filipino sa lupaing pag-aari ng mga oligarchs sa sandaling hindi sila magbayad ng tamang buwis sa gobyerno sa loob ng 3 buwan.
Binatikos ng Pangulo ang mga oligarchs sa kanyang Labor Day message sa Davao City dahil sa hindi pagbabayad ng tamang buwis.
Anang Pangulo, hihilingin niya sa sambayanang Filipino na okupahan ang mga lupang pag-aari ng mga oligarchs na ito kapag hindi nagbayad ng tamang buwis sa gobyerno sa loob ng 3 buwan. Just do it, Mr. President!
- Latest
