Supakon na sab ninyo?

Nagtuo ko nga ang mga nangangkong environmentalist mobabag na usab niining lakang karon nga pagpamutol ug pagpangibot sa kapin sa dos mil ka punoan sa kahoy nga anaa sa taliwala ug daplin sa mga karsada dinhi sa dakbayan nga anha moagi ang Bus Rapid Transit.

Niini, sigurado nga magkabangga sila si Mayor Tomas Osmeña kinsa miinsister nga ipadayon gyud niya ang proyekto kabahin sa BRT bisan pa man nga adunay 2,166 ka punoan sa kahoy nga maapektohan.

Ang uban niining maong mga kahoy anaa gipatubo sa mga center-islands sa karsada, ang uban anaa sa daplin sa karsada apan maapektohan gihapon kay may mga karsada man nga nanginahanglan nga palapdan.

Ang BRT nga “pilot project” ni Osmeña anha magbalik-balik pagpamasahero gikan sa Barangay Bulacao, Dakbayan sa Sugbo subay sa Natalio Bacalso Avenue, agi sa P. del Rosario Street, liko sa Osmeña Boulevard paingon sa Kapitolyo, liko sa Escario paingon sa Archbishop Reyes Avenue ug paingon na sa Governor Mariano Cuenco Avenue lahos na sa Talamban.

Mura’g nabutang sa salikwaot kaayong kahimtang si kanhi konsehal Nida Cabrera kay siya man hinoon ang point person ni Mayor Osmeña niining pagpatuman sa BRT, mao nga dili na siya makauban sa mga amigo niya nga environmentalist sa pagsupak sa pagpangibot niining maong mga kahoy.

Mao na diha, kinahanglan gyud nga timbang-timbangon kun unsa may palabihon, ang pagpasuwabi sa pangangkon nga usa kita ka environmentalist, apan mapugngan ang kalamboan?

Kini gud si Cabrera ug laing nangangkon nga environmentalist mibabag man sa katukoran sa usa ka coal-fired power plant diha sa Barangay Sawang Calero kay makadaot lagi kuno sa kalikupan, apan wala nila hunahunaa nga pipila ka tuig gikan karon magkinahanglan kita og dugang suplay sa kuryente.

Nindot ang mga kahoy nga mitubo diha sa daplin sa karsada, apan dili na usab tingali maayo nga pugngan nato ang pagpamutol sa mga kahoy nga anaa gipatubo sa taliwala sa mga karsada.

Nahinumdom man gud ko nga dihang si kanhi mayor Michael Rama mitinguha unta nga pamutlon o pangibton ang ubang kahoy nga anaa sa taliwala sa Pope John Paul II Avenue gikan sa Mabolo paingon sa Barangay Luz, daghan kaayong mga nangangkong environmentalist nga misupak.

Angay gyud unta nga kuhaon ang maong mga kahoy kay ang maong karsada gikan sa Mabolo paingon sa Barangay Luz, kanunay nga makasinati og grabe kaayong problema sa trapiko, ilabi na panahon sa hapon hangtod sa gabii.

Ang ubang nangangkong environmentalist misugyot pa hinoon nga butangan og bicycle lane ang maong karsada. Wala sila kuyafii?