EDITORYAL - Way kahumanang problema

Mabantayan gihapon sa kadalanan sa Dakbayan sa Sugbo kining daghang mga batang libudsuroy bisan pa man sa pagsige og pangangkon sa siyudad nga gihatagan kini og pagtagad. Wala sa ingon nga namakak ang mga opisyales sa siyudad sa Sugbo kay daghan man gihapong mga libudsuroy ilabi na panahon sa kagabhion partikular diha sa Mango Avenue.

Siguro kuwang ra gyud ang mga programa o suporta aron mamahimong epektibo kining paghipos kanila aron dili na gyud sila mamalik sa karsada.

Sumala pa sa pagtuon sa usa ka non-governmental organization nga Child Hope Philippines, adunay tulo ka klase sa mga batang libud-suroy nga naa sa kadalanan karon sa nasud.

Kadtong mga bata nga anak sa mga pamilyang diha ra pud nagpuyo sa mga aseras, ikaduha, kadtong mga bata nga anha lang gyud mag-estambayan pirme sa karsada apan mamauli sa ilang tagsa-tagsa ka mga panimalay ug kadtong mga batang nilayas na gyud gikan sa ilaha.

Bisan asa niining tulo, walay mapili kanila nga ma-exempted gikan sa pagpangabuso ug mahimo silang gamiton sa mga dautang tawo.

Silang tanan nagkinahanglan og tabang gikan sa gobiyerno ilabi na sa mga lokal nga kagamhanan.

Bisan pa man tuod nga angay basulon ang ilang mga ginikanan tungod sa pagpasagad dili mahimong talikdan sila sa gobiyerno ang kaakohan niini subay sa balaod nga patas nga proteksyon sa mga kabataan.

Sa higayon nga sila hipuson wala gyuy pasilidad nga mahimo nilang kapuy-an sud sa pipila ka buwan o tuig nga diin sila pormahon aron matarong ug mamahimong produktibong lumolupyo sa nasud.

Kay sa pagkakaron, kining gipanghimo sa mga otoridad pulos lang “band aid” solutions. Basta lang mahipos sila gikan sa karsada ug pagkahuman sa pipila lang ka adlaw buhian ra gihapon kay walay pundo alang kanila. Daghang programa nga gihimo ang siyudad sa Sugbo apan tanan pakyas nga mapahunong na kining problemaha, gani mao ra gihapong mga bataa, pamilya o mga tawhana ang nagsige og balik-balik sa kadalanan.