Kapalpakan sa BCDA CALLING President Digong!
Sa tingin ko lang, naging inutil at mabigat na pasanin ng gobyerno ang Bases Conversion and Development Authority (BCDA) noong panahon ni Noynoy. Bakit?
Aba eh, sa halip makinabang ang bansa sa gawain nito, naglustay pa ng pondo na walang kapararakan! Obserbasyon ko lang ito: Nung administrasyon ni dating BCDA president and chief executive officer Arnel Paciano Casanova sa administrasyong Aquino, maraming kaso ang hinabol sa korte na sa dakong huli ay talo!
Obviously, hindi pinag-aralang mabuti ang mga estratehiyang legal na ipinatupad para habulin ang mga kaso. Suma-total, nag-aksaya sa pagbabayad ng daan-daang milyong piso sa mga legal fees.
Isa sa mga sumablay na kaso na hinahabol ng BCDA ay ang Camp John Hay properties sa Baguio City.
Sa paghahabol ni Cassanova sa Camp John Hay, nagdesisyon ang Korte Suprema na mababawi ng gobyerno ang naturang ari-arian pero kailangang bayaran nito ang P1.42 bilyong pagkakautang sa renta ng gobyerno sa Camp John Hay Development Corp (CJHDevCo).
Sa naganap na arbitration, nilinaw ng korte na walang utang ang CJHDevCo na P3.3-bilyon gaya nang iginigiit ng BCDA, bagkus ito pa ang may utang na P1.42B dapat bayaran bago pa payagan na isauli sa gobyerno ang pamamahala sa pinag-aagawang propriyedad. Ano ba iyan??!!
This calls for a thorough investigation, Pangulong Rodrigo Duterte. Siyasatin ang nakalipas na pamumuno ni Casanova. Hindi na dapat maulit ang mga kapalpakang ganito na ang ibinubunga ay pagkalugi ng bilyong-pisong halaga sa mga kasong natatalo. Mantakin ninyo ang nasasayang na legal fees na wala namang mabuting kinahinatnan?
Dangan kasi, kung minsan, ang mga bagong administrasyon ay kung sinu-sino na lang ang inilalagay sa puwesto na pinagkakautangan ng loob kahit walang muwang sa posisyong hahawakan. Ayaw kong mag-isip nang ganyan pero bakit nangyari ang ganoong situwasyon?
Sa halip na maging paborable sa pamahalaan ang gawain ng isang ahensya, lalu pa itong nalulugi dahil sa kapalpakan.
- Latest
