EDITORYAL - Ehemplo sa kabataan

Naputos sa pagsaway ang tv comedian ug host nga si Steve Harvey kinsa maoy host sa bag-ohay lang nga kontrobersiyal kaayong Miss Universe 2015 didto sa Las Vegas, sa Amerika.

Wa pa gihapon mahuwasi ang mga tawo ilabi na ang mga Pilipino ug hasta na ang mga taga Colombia kay di man gud kadtong ordinary lang nga pasundayag, panagtigi kadto sa mga labing maanyag ug utokan nga Eba sa kalibotan.

Milyones nga mga televiewers ug netizens sa tibuok kalibotan ang nakakita sa dakong  kapalpakan ni Harvey. Ang nakaayo niadto, iya dayong gikorihian ang iyang kasaypanan apan niresulta kini sa kauwawan sa kandidato sa nasud sa Colombia.

Nasipyat siya pagbasa nga ang unta First Runner Up nga si Miss Colombia Ariadna Gutierrez Arevalo mao na man hinuoy iyang gikoronahan nga Miss Universe imbes nga si Miss Philippines Pia Alonzo Wurtzbach.

Tawo lang si Harvey nga humok usab nga masayop ug di na angay usikan pa og panahon ang balik-balikon og hisgot sa iyang kasaypanan kay nangayo na man siya og pasaylo ug nagbasol sa iyang sayop.

Ang maayong tutokan mao ang gipakitang maayong gipangbuhat sa mga napokus nga kandidata nga nagkasinabtanay ra usab dayon human sa unos.

Bisan daw nahikawan si Wurtzbach sa iyang "winning glory" niadtong orasa dalaygon gihapon ang iyang gipakitang kontrol bisan makalibog na ang sitwasyon ug nagpabilin gihapon iyang disiplina nga nagsalamin sa kinaiya sa mga Filipina.

Samtang si Arevalo bisan daw nabutang sa dili maayong sitwasyon, dalaygon gihapon sa iyang gipakitang kalig-on ug nagpabilin ang iyang postura ug nagpasalamat gihapon nga bisan sa makadiyot nga panahon, nakoronahan siya isip Miss Universe 2015.

Ang gipakita sa duha angay nga himuong ehemplo sa kabataan karon. Nga bisan sa ingon niadto nga sitwasyon ug kun unsa pa mang mga pagsuway kinahanglang magpabilin ang ilang kontrol ug disiplina.