EDITORYAL - Panalipdan ang imahe sa PNP

Nasagmuyo ang hepe sa Waterfront Police Station sa Cebu City Police Office gumikan sa usa ka post sa Facebook nga nag-viral mahitungod sa tulo niya ka mga sakop nga gipasanginlang wala mamayad sa gikaon nilang siomai sa usa ka sidewalk vendor diha sa dalan Colon. Kung tinuod nga walay dautang gibuhat ang maong mga polis ug tumotumo lamang kadto sa nag-post sa Facebook makadaot gyud kini sa ilang pagkatawo ug sa imahe sa PNP nga hugot nga giprotektahan sa ilang hepe nga si Chief Inspector Jose Gesto.

Husto g’yud si Gesto niini, kun tinuod nga gitumotumoan lamang ang iyang mga sakop sa maong netizen maayong kasohan ang nagbulingbuling sa ilang pangalan nga dugay na nilang giampingan human sa pipila ka dekadang gipasanginlan silang mga unprofessional ug abusado.

Apan kung ang tumong ni Gesto nga malimpyo ug di mauwawan ang ilang organisasyon, mas maayo siguro kun nimando siya og imbestigasyon bisan nihimakak pa ang vendor nga di tinuod ang nag-viral sa FB.  Ang netizen igo lang nagpakita sa iyang pagka-concern sa iyang palibot. Unsaon na lang kun tinuod ang maong gi-post sa Facebook?

Mas maayo nga adunay independenteng imbestigasyon nga himuon sa maong pasangil kay seryoso man kaha ni nga kauwawan sa ilang organisasyon?

Kadtong maong netizen kun ordinaryo lang nga kustomer ug mao pay pagtaak sa lugar dili mag-usik og oras aron pagkuha og litrato o video sa maong mga polis ug i-post sa iyang FB account unya magbutang-butang siya og pamahayag nga tumo-tumo.

Basin nasultihan siya o makadaghan na siyang nakabantay sa binuhatan sa maong mga polis diha sa maong kan-anan maong gikuhaan niya kini og ebidensya. Importanteng limpyo ang imahe sa PNP, usa sa pamaagi niini mao ang paglimpyo una sa sud niini gikan sa mga sakop nga nagpakauwaw sa ilang organisasyon ug dili kadtong gikan sa gawas nga igo ra nagpakita sa ilang pagpakabana para sa kaayohan sa imahe sa PNP.