Giimbitar, gibugno atol sa party

CEBU, Philippines — Nagubot ang usa ka giingong selebrasyon sa  birthday human nga ang babayeng nagsaulog mismo sa birthday giatake ang bisitang babaye nga giimbitar sa maong kumbira diha sa sitio Camagong, Barangay Lahug sa Cebu City atong Huwebes sa gabii, Oktobre 22.

Ang 20 anyos nga suspek nga birthday celebrant gidakop sa mga tanod samtang gidala sa tambalanan ang 18-anyos nga babayeng bisita niini.

Base sa inisyal nga report sa kapulisan gikatahong nitambong sa selebrasyon sa birthday sa suspek ang biktima human kini giimbitar niini.

Apan kalit lang gikatahong gibugno sa suspek ang biktima. Gibira iyang buhok ug gilambayog hinungdan sa pagkatumba niini, apan wala pa gyud matagbaw, gikatahong giguroy niini ang biktima nga nahagba na sa ubos hangtud naparok ang ulo niini.

Gidala dayon ang biktima sa Cebu City Medical Center (CCMC) tungod sa nahiagumang bun-og.

Gikatahong nasuko ang suspek ngadto sa biktima human niya nahibaw-an nga gi-bully sa biktima ang iyang magulang nga babaye nga usa ka person with disability (PWD).

Giingong naghilak ang iyang magulang tungod kay ikaduhang higayon na kini nga nahitabo.

Tungod niini, giingong giimbitar sa suspek ang biktima sa pagsaulog sa iyang adlawng natawhan, apan misangpot kini sa giingong pagpanakit.

Gidakop ang suspek sa mga barangay peace and security officers (BPSO) ug gidala sa police station alang sa booking ug tukmang disposisyon samtang nagpadayon ang pagproseso sa iyang possible nga kaso.— IBM BANAT NEWS