BFP-7 Anniversary

Gisaulog sa Bureau of Fire Protection (BFP)-7 ang anibersaryo sa pagkamugna niini pinaagi sa usa ka programa kagahapon diin ang dinapit ug pinasidunggan nga mamumulong mao si Gobernador Hilario Davide III.

Atol sa kalihukan, gihatagan og pasidungog ang mga pinili nga local chief executives sa lainlaing dapit sa Central Visayas nga mihatag og daku’ng suporta sa Bureau of Fire Protection.

Sama sa mga lakang niini pagdonar og firetruck nga kapahimuslan sa publiko ingon man lote nga katukoran og bag-ong fire station diha sa tagsa-tagsa nila ka lugar.

Dili na lang nato sila hinganlan tungod kay daghan sila. Lakip usab sa gihatagan og pasidungog mao ang pipila ka bombero nga adunay maayo nga performance ngadto sa publiko.

Ngadto sa tanang awardees, congratulations for a job well done.

* * *

Sa pikas bahin, mipahimangno na pud ang atong kabomberohan ngadto sa publiko nga mag-amping aron makalikay kita sa sunog, ilabi na gayud nga nakasinati na usab kita og grabe nga kainit.

Unta inyong hatagan og pagtagad ang mosunod nga mga pahimangno aron makalikay kita sa katalagman.

1. Kinahanglan nga ipasusi ninyo ang linya sa kuryente diha sa inyong kabalayan o mga building, ilabi na og karaan na kaayo kini nga giinstalar.

2. Batasana ang pag-ibot sa tanang appliances nga migamit og kuryente kun wala na kini gamita.

3. Kun mag-charge og gadget siguradoha nga ibton kini kun fully charge na.

4. Kun mahimo ilisi na ninyo kadtong mga karaan nga plangka ug bag-ong circuit breaker.

Pipila lang kini ka tips nga kun inyong hatagan og pagtagad mahimo kita nga luwas sa sunog. FO3 Wendell C. Villanueva, BFP