EDITORIAL - Hinabang sa biktima sa bagyo gipanagoan?

Kangil-ad baya  ning  maong  dungog kun  tinuod kining  balitaa  nga  may mga  hinabang sa mga  biktima  sa bagyo  nga  gipanagoan  sa ubang  mga  opisyal  sa lokal  nga  kagamhanan.

Nganong ingon  niini ang kinaiya  sa ubang  mga  opisyal, unsa  man  ni para  sa ilang  pamilya kay biktima  usab  sila sa bagyo?

Di na  maayo  kining maong  kinaiya  ug angay  kining  santaon  sa  mga  molupyo  sa usa  ka  lugar  nga  may  kasayoran  niini.

Usa  ka  pagpakauwaw  sa  mga  Filipino  nga gani  nagbaha  ang  hinabang  sa taga   gawas  aron  makakaon  ang  mga  biktima  nga   gipanggutom  ug  nawad-an  na  sa ilang  pinuy-anan  ug  panginabuhi.

Hinuon  kun  ang  usa  ka  kapitan  sa barangay  nawad-an  usab  og  balay  ug  wa nay makaon,  aw  nganong di man  siya  hatagan  og hinabang  nungka  nga  siya’y  mangunay  sa pagtipig  sa  mga  hinabang  alang  sa iyang  kaugalingon.

Kun  ang  maong  pagpanipig  sa  mga  hinabang  gitumong  alang  lang  sa  pamilya  sa  usa  ka  opisyal, di diay  mo  kahimo  sa paglungkab   sa ilang  bodega, aron mapagawas  kining  mga  hinabang  nga  di ilaha?

Kini gitipigan  aron ihatag  sa ilang  mga  suporter, ah  labing  di  maayo  tungod  kay  ang  usa  ka  opisyal  sa kagamhanan  wa  mag-alagad  sa  mga  mibotar lamang kaniya  kundi  sa tanan.

 Apan  nganong  iya  man  kining  buhaton  nga  kining  mga  hinabanga di man iyaha.