Sulbad sa problema

Ang Cebu City ug kanait nga mga siyudad, Mandaue, Lapu-Lapu, Talisay, apil na ang mga lungsod sa Consolacion ug Cordova, paspas ang paglambo ug nagkadaghan ang mga namuyo nga nagkinahanglan og tubig.

Ang Metro Cebu Water District (MCWD) dili makasuplay og tubig sa tanang lumolupyo sa mga dapit nga atong gihisgotan. Ang MCWD kon maoy saligan, dili gyud makahatag sa panginahanglan.

Ang ilang suplay nga tubig gikan ra sa Buhisan Dam sa Barangay Buhisan, Cebu City nga mo-supply lang og 5,000 cubic meters (25,000 ka baril) kada adlaw kon pirmi nga mag-uwan.

Kon maghuwaw gani, mahubsan ang Buhisan Dam ug wa nay tubig nga makuha. Ang laing gikuhaan og tubig sa MCWD mao ang Jacluban Dam sa Talisay City, pero apektado sab panahon sa El Niño.

Ang MCWD dunay pipila ka deep well nga gikuhaan nila’g tubig, apan dili kaayo kini kasaligan kay kon palab-anan pagkuha og tubig gikan sa tinubdan ilawom sa yuta, moabot ang higayon nga moparat na ang tubig.

Ang tubig gikan sa dagat mao na may mopuli kon mahurot na pagsuyop ang mga tab-ang nga tubig. Mao kini ang rason nga ang MCWD mipalit og tubig gikan sa mga private supplier.

Gikontrata nila ang JE Hydro & Bio-Energy Corporation nga nagkuha og tubig gikan sa Lusaran River sa Barangay Lusaran, Cebu City, ug ilang gi-process aron limpyo nga mainom og nagsuplay karon og 20,000 cubic meters (100,000 ka baril) kada adlaw.

Ang kontrata gyud unta sa MCWD ug JE Hydro mao nga mosuplay kini og 30,000 cubic meters nga tubig kada adlaw, apan paglingkod sa bag-ong Board of Directors sa MCWD, gipakubsan nila ngadto na lang sa 20,000 cubic meters ang paliton kada adlaw.

Duna pay laing mga private suppliers nga gikontrata sa MCWD, sama sa Mactan Rock, Manila Water, Abejo Builders, ug uban pa nga nag-operate og water desalination plants nga ang tubig nga parat ilang gipatab-ang.

Ang tinuod, ang Cebu pwerteng daghana nga tubig aron magamit sa nagkadaghan nga katawhan sa mga siyudad ug kalungsuran. Sama sa Tuburan nga nagsugwak ang ilang tubig nga mapunta lang sa dagat.

Matud ni Engr. Joffrey Hapitan, ang chairman sa JE Hydro, nga mahimong kapahimuslan kining maong tubig gikan sa Tuburan ug ubang mga dapit ug ikasuplay sa mga siyudad ug lungsod.

Ang “surfaced water” sa kabukiran nga wa ra kapahimusli, mahimong i-develop ug masulbad ra ang problema sa tubig sa Cebu sa umaabot nga katuigan.

Pinaagi sa mga dagkong tubo, mahimong ang tubig gikan sa surfaced water sa ubay-ubay’ng mga dapit sa Cebu, madala dinhi sa siyudad ug dili na unya kita maproblema sa tubig.