Pangilad ni Martin
Imbes mangayo og pasaylo o bisan bation na lang og kauwaw sa pagpaburot sa iyang mga sakit, si kanhi House Speaker Martin Romualdez nipadayon sa iyang pagpaka aron ingnon nga angay’ng magpabilin sa ospital ug dili angay nga ibalhog sa prisohan.
Imbes mokumpisal nga napugos lang sa pagpamakak para sa ilang kliyente, ang mga abogado ni Romualdez nipasidaan pa nga nameligro ang iyang panglawas dihang gipagawas sa Cardinal Santos Medical center. Salamat sa kaisog sa mga espesyalista sa Philippine General Hospital (PGH) nga nibaraw nga ang medisina gamiton sa pamolitika.
* * *
Utro sab ang mga mahistrado sa third division sa Sandiganbayan nga maoy gitugpahan sa kasong plunder ni Romualdez. Human nisugo sa pagtanggong niya sa male dormitory sa Quezon City Jail, tungod sa rekomendasyon sa PGH, nitugot nga magpadayon ang salida sa sinumbong.
Pinaagi sa pag-uyon nga dili moadto si Romualdez sa korte ug gipa-atubang sa iyang arraignment sa niaging semana pinaagi lang sa videoconference gikan sa prisohan. Bisan gipasaligan ni PGH Medical Director Gerardo Legaspi nga si Romualdez dili himatyon ug dili seryuso ang hulga nga atakehon sa kasingkasing.
* * *
Labaw pang kuwestiyonable ang liderato sa Bureau of Jail Management and Penology (BJMP) nga maoy nagdumala sa prisohan ni Romualdez. Walay gihisgutan ang mga espesyalista sa PGH nga kalisod sa paglihok ug paglakaw pero ilang gitugotan ang sinumbong nga mag-wheel chair sa mubo nga distansiya gikan ug padulong sa infirmary ug videoconference room.
Pipila lang kini sa special treatment nga nalilian tungod sa mga letrato nga ilang gipagawas sa publiko. Ambot giunsa pagkugos-kugos si Romualdez samtang walay nagtan-aw.
* * *
Klarong wala motuo ang taga BJMP sa pasalig ni Presidente Ferdinand Marcos Jr. nga ipahamtang ang balaod bisan batok sa iyang mga paryente ug mga alyado. Kumbinsido ang mga tagdumala sa prisohan nga mas espeso gihapon ang dugo ug peligrong silay pahimungtan kon magka-uli ang maayong kabubut-on sa manag-agaw.
Ang bentaha mao nga naa sa samang prisohan ang mga kaatbang sa politika ni Romualdez nga silang Senador Jinggoy Estrada, Senador Rodante Marcoleta ug kanhi Kongresista Mike Defensor. Sila ang unang motiyabaw kon ibalhin si Romualdez og air conditioned nga selda samtang sila pamaolan og pamaypay sa ka-alimuot.
* * *
- Latest
