EDITORYAL - Ang kamahinungdanon sa fire truck sa barangay

Matag  karon ug unya   bantayanan  kaayo  ang  sunog sa  nagkalainlaing  lugar  ilabi  na sa mga  lugar  kansang  mga  kabalayan  nagdasok.

Di kini ikalimod  karong  panahona  ug  makaluluoy  kaayo  ang  mabiktima  kay  gawas  nga mawad-an  og  bay, mawad-an  pa  sa tanang  mga  butang  nga  gipundar sud  sa pila  ka tuig sama  sa mga senina,  mga muwebles, ug  uban  pang  mga  kasangkapan sa balay  ug  pagpuyo

Apan  ang  nakapait  kay  bisan  ania  na ang  nasud  sa ingon  niining  kahimtanga,  ang  mga  opisyal sa local  nga  kagamhanan  kuwang  og  pagtagad  sa kamahinungdanon  sa trak  sa bombero sa matag  barangay.

Ang  mahinungdanon  kanila mao ang  mga  mahalon  kaayong  sakyanan  nga   gamiton  sa ilang  nagkalainlaing  serbisyo  sa barangay  nga  di alang  sa sunog.

Di  man ta  molalis  ug  di  ta  mosupak  o mosaway  niini  kun  gituohan  sa usa  ka  hepe  sa local  nga  kagamhanan  nga  mahinungdanon  kaayo  ang  sakyanan  alang  sa ilang  mga  suroy-suroy  sa  ilang  mga  konstituwente.

Apan  sa  mga  barangay  nga  sunogonon  o  peligro  nga  masunog  tungod  sa nagsikit-sikit  nga  kabalayan, wa ba  gyud  silay  plano  sa pagbutang  bisan  multicab o kaha traysikol  nga  magamit  pagbomba  og  tubig  sa panahon  nga  may  mohugpa  nga  sunog  sa  maong  barangay?

Naandan na   sa  tanan  nga anha  magsalig  nianang  trak  sa bombero  sa  headquater  sa fire department nga  kasagaran  inig-abot  sa maong  mga  trak  ugdaw  ang  daghang  mga  bay.

Lahi  kun  may  nagpundo  nga  gagmay  nga sakyanan  sa  barangay  nga  may  tubig  batok  sa sunog,  kay  mintras magpaabot  sa mga  dagkong  trak  sa bombero  gikan  sa headquater, makadaginot  og  pawong  sa  pasiunang  mga bay  nga  habhabon  sa  kayo  sa palibot  sa usa  ka barangay.

Ambot  bitaw  ngano  nga  layo  ra man  kaayo  og panaw  ang  hunahuna  sa  mga  mayor  kalabot  ning  butanga  nga  unta  di man  kada adlaw  mopalit  sila  og  sakyanan  kun  aduna  na,  o kaha  di  kada adlaw  tubilan  kini  og  gasoline  o  kaha  krudo  kay  padaganon  man  lang  kini  sa panahon  nga may  sunog.

Karon taliabot  ang  eleksyon  ug nagtuo  ta  nga  ang  bag-ong mangatungdanan  sa  siyudad motutok  ning maong isyu.