Cybersex ug ang kawad-on

Ang kapolisan sa dakbayan sa Lapu-Lapu mitug-an atol sa binuwan nga forum sa kapolisan sa giingong paghitak sa suliran sa “cybersex” sa labing minus tulo ka mga barangay sa nahisgutang syudad.

Si Sr. Supt. Anthony Obenza mitug-an nga basi sa intelligence report nga ilang nadawat dunay nga bana nga milawog sa ilang kaugalingon nga mga asawa sa maong immoral nga negosyo.

Ang mga bana kuno mismo maoy mosugo sa ilang mga asawa nga mangita og langyaw nga ika-chat sa Internet ug mohimo og bastos nga kalihukan bugti sa dakong kantidad sa kwarta.

Admitido ang kapolisan nga maglisud sila pagsumpo niini tungod kay gawas nga lisud mailhan ang mga panimalay nga naghimo niini, kuwang sab ang kapolisan sa mga kahimanan ug kahibawo unsaon pagsanta ang maong matang sa krimin.

Ang pagkuyanap sa cybersex crime diha sa Lapu-Lapu ug sa ubang dapit sa Sugbo ug sa nasud timailhan lang sa paghubas na sa moralidad sa pamilya. Tiaw mo bay ang bana mismo mosugot nga ang iyang asawa maghubo atubangan sa kamera samtang sud-ongon sa manyak nga mga langyaw?

Duna pay mga higayon nga hastang mga sip-onon pa intawn nilang mga anak apilon sa ilang kabuang. Nganong duna may mga pamilya nga mobaligya sa ilang kalag ngadto ni Satanas pinaagi sa paghimo sa maong binuhatan?

Ang tubag sa mga nasakpan nga nalambigit sa maong kalihukan niining maong pangutana mao nga, kawad-on ug kagutom maoy nagtukmod nila nga mohimo niini.

Kay matud pa nila ang “taong nagugutom kahit sa patalim ay kumakapit.”

Sumala pa nila nga mas maagwanta ang pagpakauwaw pinaagi sa pagpakita sa hubo nga lawas atubangan sa kamera kay sa matulo nga nagkutoy ang tiyan. Mas maagwanta ang kauwaw kay sa magsud-ong sa ilang mga anak nga nagtiyabaw sa kagutom.

Kun ingon niini ang sitwasyon sa ubang pamilya dinhi sa nasud, diin man si Presidente Aquino og sukaranan sa iyang pangangkon atol sa iyang SONA nga nikunhod na ang gidaghanon sa mga tawong gigutom dinhi sa atong nasud? Kun kagutom maoy nagtukmod sa mga tawo aron paghimo sa dautan sama sa cybersex crimes dili husto nga tungod kay nikuyanap ang maong problema mas nidaghan diay ang tawong gigutom?

Ang gipanghambog sa gobyerno nga Pantawid Pamilya Program dili igo aron paghaw-as sa matag kabus nga pamilya gikan sa kagutom. Ang angayang gihimo sa gobyerno inay hingtan ang mga kabus hatagan ni og panginabuhian.

Sa maong programa dako og papel ang mga local nga opisyal pagsiguro nga mahatagan og livelihood project ang mga kabus nga pamilya aron malikayan nga mohimo sila og illegal.

Hinaut nga ang pagkuyanap sa cybersex diha sa Lapu-Lapu wala magkahulogan og pagpabaya sa mga local nga opisyal sa nahisgutang dakbayan.

* * *

[email protected]